Asturianistes.com entama la so presencia na rede reclamando’l dominiu .AST

25 ochobre 02:53 2006 Imprimir

Sigún arrecueye’l portal, “si anguaño hai una reivindicación plenamente asturiana n’Internet, esta ye dende siempre la reclamación d’un dominiu propiu p’Asturies. Históricamente dende Asturies la falta de poder usar un dominiu específu fizo que s’emplegara un dominiu d’otru territoriu, el .AS d’American Samoa. Asina ye qu’organizaciones asturianistes como Izquierda Asturiana (IAS) – Asturianistes lleven tiempu solicitando la concesión d’un dominiu propiu”.

Un exemplu d’esto, qu’arrecueye Asturianistes.com ye que “dende Izquierda Asturiana siempre sorrayaron que l’usu del .AS ye la demostración práctica de la necesidá d’identificación de lo asturianu na rede de redes.”

Na opinión del portal web asturianu, La concesión del dominiu .CAT pa Cataluña ye una oportunidá per importante pa qu’Asturies pueda cuntar con una TLD propia. Los catalanes a traviés de l’Asociación PuntCAT ficieron un bon trabayu y algamaron que l’organismu regulador ICANN aprebase’l dominiu puntu CAT . Too un ésitu que pue sirvir de reflexu pa les organizaciones asturianistes que tan na xera de qu’Asturies tenga un espaciu propiu n’Internet. Agora más que nunca ye necesariu entamar a trabayar en serio pa que la comunidá llingüística y cultural asturiana tenga un dominiu qu’identifique lo que somos. Mientres n’Asturies siguimos usando’l puntu AS d’American Samoa otres naciones ya tan nel camín reivindicativu de tener les sos propies TLD’s como Galicia col puntu GAL, Bretaña col puntu BZH o Escocia col puntu SCO.”

Asturianistes.com ye una Rede de Blogs Asturianistes y n’asturianu, un blog colectivu sobre l’Asturianismu, que ta acabante d’entamar a albergar blogs que ya se podíen consultar na rede.

Asturianistes.com

  Categories:
Loading Facebook Comments ...