Asturianaes: cuando l’amestamientu musical ye cenciellu y sinceru

Un perguapu proyectu de la Bagad Ronsed Mor de Locoal-Mendon y una bandina y dos cantantes asturianes ficieron respingase al públicu qu’enllenaba na nuechi del vienres el Teatru de Lorient. Sentir una tonada en bretón, arropada por una bagad y una bandina, faciendo tremar un Teatru, bien val una misa.

Dende hai 49 años, la Bagad de Locoal-Mendon nunca dexa d’esportar música tradicional n’importantes escenarios franceses como el Stade de France, Olimpia, Bercy y siempre se calteriza por dir a la gueta de nueves llendes. Y xusto cuando ta a piques de celebrar el so mediu sieglu miro p’hacia Asturies.

Esta vegada, Ronsed Mor escoyó dirixise al sur pa escontra Asturies y encontró xente que perconoz el Festival y l’amestamientu cultural ente los pueblos celtes que se llogra equí cada branu de forma natural. Atopó a Andrés y al so hermanu, a Marta, a Pepín de Muñalén, a Ruma Barbero y a Verónica y Clara. Y d’esti alcuentru nació l’espectáculu “Asturianaes” qu’abrió esti vienres les puertes del Gran Teatru al aconceyamientu de dos sentires bien averaos unu a l’otru: l’asturianu y el bretón.

Les declaraciones previes a los medios bretones ya lo dexaben bien a les clares:  “Fiximos conexones especiales con músicos nesta rexón nos últimos años. Esti espectáculu ye un amiestu de les nueses dos cultures. Esta ye la culminación d’un añu y mediu d’intercambios y dos fines de selmana residenciales con tolos artistes “, dicía Iwan Calvez Penn baterista de la bagad na rueda de prensa sobre un amiestu musical de gaita, Gavotte pourlet, cornamuses y bombardes y voz que constrúin xotes, pasodobles y xiraldilles asturianes y dellos otros cantares tradicionales con una visión de globalidá musical bien entendía.

La Bagad Ronsed Mor, cuatro vegaes campeona del campeonatu de Bagadou, y una representación interxeneracional de lo que dende la mocedá musical y cultural ufre Asturies nesti momentu llograron respingar a un Teatru de Lorient enllenu de xente ablucada que pidía bises ensin parar. Clara Diez Márquez y Verónica Fueyo Alcedo diéron-y cola so voz amañosa y forte, al tiempu que sincera y sentía, a los sones de la Bagad y de la Bandina Caldo y Os Rabizos (gaita, saxofón, acordión y percusión) . “Va Ser l’espectáculu de los nuesos 50 años. Queremos presentalo en festivales per Francia y Asturies “, dicía’l mesmu vienres Romain Toulliou y nu podíen pa ello tener meyor carta presentación que lo que se vió y se sintió nel Teatru de Lorient esti agostu.