Asociaciones de Llión denuncien al Estáu y a la Xunta de Castiella por nun cumplir la Carta Europea de les Llingües

31 avientu 05:49 2014 Imprimir

Les asociaciones en defensa de la llingua llionesa El Teixu, Furmientu y Faceira vienen acabante presentar al Conseyu d’Europa un informe nel que se denuncia tantu al Estáu Español cumo a la Xunta de Castiella y Llión por incumprir la obligación de protección del llionés asumida por España al subscribir nel 2001 la Carta Europea de les Llinguas Rexonales o Minoritaries. Na denuncia acusen tamién al Estáu y a la Comunidá Autónoma “de facer casu omisu de las recomendaciones del Conseyu d’Europa emitidas en 2012, nas qu’esta organización internacional reclamaba actuaciones concretas de promoción del idioma llionés y la sua introducción no sistema educativu”.

Sigún el comunicáu conxuntu que les asociaciones El Teixu, Furmientu y Faceira espublizaben nestos díes, “el Conseyu d’Europa solicitóu, amás, más información a las autoridades estatales y autonómicas sobre la protección del llionés, petición d’información que las autoridades negoron a esta organización internacional, dao que’l 9 de mayu del 2014 se fexo públicu por parte del Reinu d’España’l Cuartu informe sobre’l cumprimientu n’España de la Carta Europea de las Llinguas Rexonales ou Minoritarias, del Conseyu d’Europa, y no mesmu hai una ausencia total de referencias al llionés cumo llingua protexida pola Carta Europea. Esto supón un gravísimu incumprimientu por parte de la Comunidá Autónoma de Castiella y Llión y del Estáu Español de la Carta Europea de las Llinguas Rexonales ou Minoritarias del Conseyu d’Europa, pues de tódalas comunidades autónomas con llinguas propias diferentes del castellanu namás Castiella y Llión recusóu dar información sobre la realidá llingüística”.

Amás d’ello, l’Asociación Cultural Faceira, “exercitando el dereitu de petición, solicitóu formalmente en sanxuán del 2014 a la Dirección Xeneral de Coordinación de Competencias conas Comunidades Autónomas y las Entidades Locales del Ministeriu d’Alministraciones Públicas, al emparu del artículu 29 de la Constitución Española y de la Llei Orgánica 4/2001, del 12 de noviembre, reguladora del Dereitu de Petición, que se complementara l’informe español conos datos relativos al llionés, petición que nun foi nin atendida nin contestada, vulnerando asina esti dereitu constitucional, lo que demuestra la nula voluntá del Estáu d’asumir las suas obrigaciones internacionales en relación cona aplicación de la Carta al llionés”.

Sigún estes asociaciones l’Estáu Español ye’l garante postreru de l’aplicación de la Carta n’España a les llingües protexíes, “como ye’l casu de la llionesa, en sintonía directa cona Xunta de Castiella y Llión que nun cumpre tampouco’l mandáu estatutariu de protección y promoción del llionés recoyíu nel artículu 5.2 del Estatutu d’Autonomía, eliminóu de maneira unillateral y illegal la llingua llionesa del ámbitu de protección d’esti tratáu internacional d’ámbitu européu.”

Subscriben esta nota les siguientes asociaciones en defensa de la llingua llionesa: El Teixu (Asturias, Llión, Zamora y Bregancia), Furmientu (Zamora) y Faceira (Llión).

  Categories:
Loading Facebook Comments ...