ASMA prepara un Foru Debate alrodiu la Nueva Emigración en Madrid

05 marzu 03:34 2005 Imprimir

Lo qu’entamó como una campaña espontánea de protesta en forma de sms cola conseña:’Yo tamién soi una llienda urbana’ pa retrucar a les conclusiones optimistes del Informe Lorences ta camín de tresformase nel iniciu d’un fondu discutiniu alrodiu de les causes de la nueva emigración asturiana. L’asociación trabaya na preparación d’un Foru Debate pa celebrar na capital del estáu alrodiu del éxodu de la xente mozo fuera del nuestru país.

Esta asociación que cuenta anguaño con más de 1.500 afiliaos quier que los representantes políticos, los axentes sociales y la Universidá d’Uviéu aconceyen nun alderique abiertu pa reflexionar a propósitu de la sangría social que supón l’abandonu d’Asturies de cientos de mozos cada añu.

La mecha que prendió la indignación y el plasmu na colonia asturiana de Madrid -una de les más numberoses de la nueva emigración- foi l’informe del caderalgu Joaquín Lorences alrodiu de la empleabilidá de los llicenciaos na Universidá d’Uviéu y emponderáu pol presidente Areces como preba argumental de que la fuga masivo de xente mozo yera alpenes ‘una llienda urbana’ ensin correspondencia cola realidá.

L’asociación “ASMA(Asturianos en Madrid)” quier agora qu’esos mesmos responsables políticos y los autores del informe, ente otros axentes sociales implicaos, sienten a desplicar los sos argumentos razonaos y a debatir seriamente el que ye ún de los problemes más graves de la nuestra tierra.

  Categories:
Loading Facebook Comments ...