Artistes de la Factoría Cultural esponen sos obres en Eslovenia

Artistes de la Factoría Cultural esponen sos obres en Eslovenia
12 marzu 11:22 2019 Imprimir

Cuaro artistes de la Factoría Cultural esponen sos obres en Eslovenia dientro del proyectu Wom@rts de la UE. L’amuesa puede ser visitada hasta’l 13 d’abril na UGM Maribor Art Gallery de la ciudá eslovena. Son Nano González, Cristina Busto, María Castellanos y Fernanda Álvarez amuesen los sos trabayos dientro de la esposición “Woman, (be)coming”.

El proyectu européu Womrts, del que ye sociu la Fundación Municipal de Cultura d’Avilés, empieza a amosar les resultancies de trabayos de les muyeres creadores que participen nél. Otru de los socios, UGM Maribor Art Gallery (Eslovenia), acueye hasta’l miércoles la primer esposición onde se presenten les resultancies de les trés residencies artístiques llevaes a cabu dientro de Womrts, contextualizado nel programa Europa Creativa.

L’amuesa lleva por títulu “Woman, (be)coming”, ta comisariada por Breda Kolar Sluga  y puede ser visitada hasta’l 13 d’abril na ciudá eslovena. Los trabayos espuestos tienen un filo conductor, la obra “El segundu sexu” de Simone de Beauvoir publicada fai 70 años. Nesta esposición preséntense obres de 16 muyeres de 7 países (Eslovenia, Lituania, Croacia, Irlanda, Francia, Noruega y España) ente elles 4 artistes asturianes escoyíes pola Factoría Cultural d’Avilés.

Cristina Busto y María Castellanos, nel campu del arte dixital, qu’esfrutaron d’una residencia na Factoría Cultural en septiembre de 2018 xuntu con otres 10 artistes europees invitaes polos distintos socios del proyectu.

Fernanda Álvarez y Nano González nel ámbitu de grabáu ya ilustración respectivamente, en participando nes residencies artístiques que se desenvolvieron en Limerick y Angouleme el pasáu añu.

Raquel Llagartos y Marta Fermín, que tamién formen parte del proyectu n’ilustración y grabáu, van esponer los sos proyectos nuna segunda esposición programada pal 26 d’abril tamién en Maribor.

Na inauguración de “Woman, (be)coming”, Cristina Bustu, Raquel Llagartos, Nanu González y María Castellanos tuvieron acompañaes pola responsable de la Factoría Cultural d’Avilés, Anabel Barriu.

Relación de muyeres creadores participantes na esposición “Woman, (be)coming”

Ana Pecar (Eslovenia)
María Castellanos (España)
Cristina Busto Álvarez (España)
Marija Stonyte (Lituania)
Hanne Larsen (Noruega)
Stéphanie Cadoret (Francia)
Haya Blanco (España)
Fernanda Álvarez Jimenez (España)
Aoiffe Barret (Irlanda)
Neringa Žukauskaite (Lituania)
Audrey Potrat (Francia)
Samira Kentric (Eslovenia)
Korina Hunjak (Croacia)
Merieme Mesfioui (Francia)
Nanu González (España)
Fionnualla Doren (Irlanda).

Más información en http://www.ugm.si/razstave/women-becoming-3149/ y www.womarts.eu

  Categories: