Portada Emigración Artistes d’Asturies y Cuba estrenen en L’Habana l’espectáculu ‘Señaldá’

Artistes d’Asturies y Cuba estrenen en L’Habana l’espectáculu ‘Señaldá’

by asturnet

La estrena del montaxe ‘Señaldá’ ye l’elementu más llamativu del programa qu’Asturies va ufiertar estos díes en Cuba con motivu de la cellebración de ‘La Huella de España’, festival cultural de L’Habana nel qu’esti añu la rexón ye l’invitáu especial.

‘Señaldá’ ye un espectáculu folclóricu-teatral-musical que s’estrena precisamente na capital cubana y nel que collaboren los grupos integrantes de la Federación d’Agrupaciones de Folclor Asturianu, el colectivu de teatru Margen, el coru La Flor y la cantante de tonada Caunedo. Amás d’estos artistes esplazaos a L’Habana dende Asturies pa la ocasión, formen parte del elencu varios miembros de los grupos folclóricos vinculaos a la Federación de Centros Asturianos de Cuba, cola que se va hermanar la Federación d’Agrupaciones de Folclor aprovechando la so estancia nel país.

La Federación d’Agrupaciones de Folclor Asturianu agrupa a 25 colectivos y toos ellos van tar representaos nel espectáculu, pal que cadún aporta dos persones. Esta circunstancia ye representativa del espíritu de collaboración ente grupos col que se tien ellaborao’l montaxe, el primeru de les sos característiques que se pon en marcha nel Principáu y que, en versión orixinal, sólo va poder esfrutase una parte de la Asturies del Esterior.

‘Señaldá’ estrenase’l xueves 27 nel teatru García Lorca de L’Habana y va reponese unos díes despues na localidá de Cienfuegos. Ente otros elementos tradicionales de la cultura asturiana, el guión inclúi una boda, una puya’l ramu y una esfoyaza.

La puesta n’escena de ‘Señaldá’ ye l’elementu más orixinal del programa que va amosar la rexón con motivu del festival ‘La Huella de España’, que se va inaugurar esti sábadu 22 d’abril nel Anfiteatru de L’Habana Vieya y nel que van tar presentes el músicu Chus Pedro, la cantante Tina Gutierrez y l’escritor Xuan Bello, ente otros artistes y personaxes de la Cultura d’Asturies.

Tamién te podria gustar