Artículu de Consuelo Vega sobre la figura de la escritora Nené Losada Rico

El sábadu 11 d’abril morría Nené Losada. Dexábanos una persona amable por demás, intelixente y cariñosa. Una muyer mui querida, tanto na so tierra valdesana como en toa Asturies. Una escritora.

Ye difícil, dende la cercanía, facer dalguna valoración de lo que supón la so obra y la so aportación al panorama de la lliteratura asturiana. Cola dificultá sumada, nel mio casu, de la emoción y l’afectu por una persona mui cercana, amiga de la familia dende hai décades. Con Nené y el fíu, Juan Antonio, xúnenos en casa un cariñu sinceru al tiempu que la fuimos viendo escribir y esplorar nuevos caminos lliterarios.

Pero quiero, polo menos, apuntar un par d’idees. La primera d’elles, tocante a la so condición poética «local». Porque ye cierto qu’a Nené la queríemos n’Asturies y, especialmente, en Valdés. Ye, ensin dulda, la poeta valdesana, la heredera na memoria colectiva del padre Galo, la escritora cercana, querida y admirada. Y eso, que ye cierto, nun nos debe confundir, porque nun diba ser bono qu’esa cercanía amenorgara’l valir de la so obra. Nené Losada ye una poeta valdesana, pero nun ye un «poeta local» nel sentíu reductor de la palabra; la bona poesía nunca ye local, ye universal con independencia del so alcance, fama o númberu de llectores. Y Nené ye una poeta mayor.

La segunda idea ye que, seguramente, los poetes nun escueyen la llingua na qu’escriben; al revés, ye la llingua la qu’escueye y manda al escritor. Nené Losada, poeta n’asturianu y en castellán, nun ye la mesma escritora nes dos llingües. Nun escribe lo mesmo, cuando en castellán, cuando n’asturianu. Hai nella dos autores, dos voces lliteraries, y ye’l tema, la situación, la posición de l’autora ente la realidá la que determina cuála ye la llingua emplegada.

Tengo pa mi que ye poeta mayor nes dos llingües; pero onde ye estraordinaria, onde destaca pola densidá poética, pola contención estilística, pola madurez y sensibilidá esquisita, ye n’asturianu, nel so asturianu occidental que trayía dende la infancia en San Fliz. La so poesía n’asturianu esperimenta una evolución notable y almirable: dende los Cantares valdesanos, aquella edición que yo tuvi la suerte de preparar con ella y de prologar, hasta Entre apigarzos y El nome de las cousas, Nené percuerre la sienda poética que va de la tradición asturiana y el versu popular a la poesía fonda y precisa que la consagra como poeta escepcional.

Nun dexa de ser curioso que seya xusto na llingua pequeñina, na llingua asturiana occidental, onde algama los más grandes cumales d’escelencia lliteraria, la universalidá que ye la patria de la bona poesía, seya cuala seya la llingua.

Por eso podemos afirmar que Nené Losada ye una de les escritores fundamentales del sieglu XX asturianu: pola so trayectoria vital -una muyer, cásique autodidacta, que pasó la infancia nun pueblín asturianu y que, pese a les llimitaciones d’una dictadura especialmente dura pa coles muyeres, nunca nun renunció a la lliteratura y la creación-; pola so activa participación na vida cultural de Valdés y d’Asturies; pol so papel de maxisteriu, d’heredera d’una tradición que supo apurrir a los escritores más mozos, tresformada y renovada; pola calidá de la so obra lliteraria, n’asturianu y castellanu, y por contribuir al prestixu, l’arriquecimientu y la dignificación de la llingua asturiana.

El Gobiernu d’Asturies quixo yá reconocer toos esos méritos concediéndo-y la Medalla d’Asturies, la distinción más alta de la nuestra Comunidá.

Una Medalla que recoyía’l so valir y el sentimientu d’afectu de la sociedá asturiana, una Medalla p’agradecer la contribución valiosa de la so obra y la so trayectoria personal. La familia, los vecinos, los amigos y amigues, perdimos a Nené Losada, la madre atenta y cariñosa, la amiga entrañable, la muyer comprometida, la voz serena y clara que recitaba con envidiable memoria los sos poemes; pero Asturies seguirá teniendo nos sos versos a la gran escritora.