Arranca Ximiélga.me, la primera rede social n’asturianu

23 marzu 11:19 2010 Imprimir

Esti día vieno acabante de facese anuncia de l’apertura de Ximiélga.me, primer rede social asturiana, qu’aspira a convertise nun prácticu preséu col que compartir información y conteníos de toa triba ente los usuarios coneutaos.

Ximiélga.me (http://ximielga.me) ufre al usuariu una serie de servicios mui asemeyaos a los incluyíos en redes como Facebook o Twitter, como’l ‘microblogging’, la creación d’álbumes de fotos, la xestión d’enllaces, la integración de conteníos multimedia de sitios como Youtube, Dailymotion, Jamendo o Viemo, o el reductor asturianu de señes URL Acurti.es… La rede asturiana ta pensada pa funcionar en too momento como ‘amestador’ d’usuarios de eses otres redes.

Pa ello, Ximiélga.me integra les sos funciones mui fácilmente con Twitter o Identi.ca, y los conteníos de la rede asturiana puen espublizase automáticamente n’otres como Facebook, MySpace o en sitios de noticies como Esbilla o Chuza!, ente otros. Esti aspeutu, el de la integración y interconexón con otres redes, sedrá una de les estayes nes que Ximiélga.me pondrá l’acentu nel so desarrollu futuru.

El sitiu, que naciera como una alternativa n’asturianu a les grandes redes sociales, preséntase finalmente col envís de ser un puntu d’alcuentru n’internet pa tolos asturianos, d’Asturies y de tol mundu, y por ello ta disponible tamién en castellanu y n’inglés.

Ximiélga.me foi desendolcáu por Altuxa.com, alcuñu col qu’el corverán Mikel González empobinare dende l’añu 2000 dellos proyeutos n’internet, na so mayoría relacionaos cola creación de ferramientes web n’asturianu. N’esti casu, Altuxa.com contó col sofitu del colectivu pa la traducción y promoción del software llibre, Softastur, y de la trentena de blogueros que dende xineru vienen testiando la rede enantes de la so apertura definitiva. Ximiélga.me ta basao na plataforma llibre Elgg.

Ximiélga.me

  Categories:
Loading Facebook Comments ...