Arranca CaleyAvilés con una visita pel parque Ferrera nel Día Mundial de los Árboles

Arranca CaleyAvilés con una visita pel parque Ferrera nel Día Mundial de los Árboles
28 xunu 08:58 2019 Imprimir

Esti 28 de xunu, dende les 19 hores, arranca una edición nueva de CaleyAvilés con una visita pel parque Ferrera nel Día Mundial de los Árboles.

La bióloga Ángeles Rodríguez Tuñón esplicará en llingua asturiana los usos y creencies qu’arrodien a les especies más presentes na cultura asturiana. Ye necesario apuntase enantes llamando al teléfonu 985 545 508 o mandando un corréu electrónicu a la direición estayallingua@aviles.es.

La Estaya de la Llingua del Conceyu d’Avilés yá lleva cuatro años siguíos, col respaldu del públicu nes tres primeres ediciones, organizando’l ciclu d’actividaes Caleyavilés, col que les persones participantes van poder descubrir andando y en llingua asturiana dalgún de los requexos ms emblemáticos de la ciudá. Van ser cuatro visites de baldre ente los meses de xunu y setiembre, una visita al mes.

La primera ye esti vienres 28 de xunu, coincidiendo col Día Mundial de los Árboles. El parque Ferrera sedrá l’escenariu d’una visita que va tar guiada por Ángeles Rodríguez Tuñón, bióloga, educadora ambiental y monitora d’ociu y tiempu llibre con estudios avanzaos en llingua asturiana.

Veránse les especies más representatives de la cultura asturiana, como’l carbayu, el texu, la castañal o la faya. Tamién se van contar lleendes, creyencies y usos asociaos tradicionalmente a caún d’estos árboles. La hora pa entamar sedrá les 19:00,  saliendo de delantre l’edificiu de La Noria, con una duración d’hora y media. Recomiéndase llevar zapatos cómodos. Neños y neñes menores d’edá tendrán de dir con una persona adulta.

Pa participar nesta primer visita guiada de Caleyavilés ye necesario apuntase primero, de baldre, llamando al teléfonu 985 545 508, o mandando un corréu electrónicu a la direición estayallingua@aviles.es. Hai 25 places como muncho pa cada visita. El Día Mundial de los Árboles festéxase n’Europa cada 28 de xunu. Instaurólu’l Congresu Forestal Mundial nel añu 1969 pa destacar lo importante que son estes especies vexetales pa la Tierra.

La ciudá d’Avilés tien una cantidá d’árboles públicos de casi 3.940 y la especie con más exemplares ye’l  pláganu. L’árbol exóticu más vieyu ye un Eucaliptus globulus de más de 200 años que ta nel parque Ferrera, y l’árbol autóctonu más vieyu ye un carbayu (Quercus robur) allugáu nel parque d’El Carbayedo.

El programa de Caleyavilés pa 2019 complétase con tres visites guiaes más. La primera d’elles tendrá como escenariu’l parque de La Madalena, y sedrá pal vienres 19 de xunetu, guiada tamién pola educadora ambiental Ángeles Rodríguez Tuñón.

Per otru llau, les otres dos visites guiaráles Denis Soria Fernández, téunicu superios en Guía, Información y Asistencia Turística, y Guía Oficial del Principáu d’Asturies. La primera tendrá como protagonista’l cascu históricu d’Avilés, y va incluyir la entrada a la capiella de Las Alas. Sedrá’l vienres 2 d’agostu.

El programa de CaleyAvilés 2019 pieslla cola visita guiada al Cementeriu de La Carriona y al barriu de Miranda, el vienres 6 de setiembre.

  Categories: