Arranca Lorient col aportar de les Delegaciones

29 xunetu 03:39 2006 Imprimir

La primera xornada del Festival entamó cola actuación pela nueche al aire llibre del grupu Brenga Astur, que va seguir nel festival y tien previstes delles actuaciones más, y col aportar a Lorient de toles delegaciones qu’esti añu van a participar na 36 edición del Intercélticu. Con Australia como invitada d’honor, los celtes de tol mundu aprovecharon la nueche pa perconocer l’allugamientu de les carpes de les distintes delegaciones y acostase bien ceo pa entamar la xornada del sábadu con posibles.

El sábadu ye na realidá’l primer día d’actividá festivaleras y yelo amás dende bien temprano, porque davezu entama l’actividá con pasacais y a les 11 ya se cellebra la primer inauguración, la de la exposición Euro Celtic Art, qu’axunta artistes de tolos países celtes presentes nel Festival.

Tres de l’actuación de Brenga Astur nel Espace Bretagne, los más amigos dela nueche despidiérones na carpa asturiana, que rixe esti añu Chimo, y que ta asitiada nel llugar nomáu como “Quai des pays celtes”. La carpa/chigre asturiana ye muncho mayor que notros años y ufierta una bona riestra de productos tradicionales y artesanales asturianos, espardiendo’l so conocimientu ente bretones, galeses, escoceses y demás celtes allegaos del restu Europa y d’America y Oceanís, por mor de grandes cartelos colos nomes y composiciones de los productos en francés y n’inglés. Pero lo más importante del chigre astur ye que yá ye nomáu ente los más festivaleros y darréu d’ello suel pesllar nel caberu llugar de la nueche del FIL.

  Categories:
Loading Facebook Comments ...