Arranca la III Muestra de Teatru ‘La Escena Contemporanea’

La Universidá presentó esti martes pela mañana una nueva edición de ‘La Escena Contemporanea’, que nun ye sinon la III Muestra de Teatru Contemporaneu, que nesti 2014 presenta cuatro espectáculos en collaboración col Conceyu d’Uviéu. Dende esti xueves a les 20.00 hores, podrán veses dalgunes de les obres de teatru y danza más destacaes del circuitu español nel Teatru Filarmónica a esa mesma hora cada selmana con accesu llibre hasta completar l’aforu.

La nueva edición de ‘La Escena Contemporanea’ abrese “con arriesgaes puestes n’escena y temátiques d’interés, a manera de teatru pa esfrutar y pa pensar”, según informó la Universidá nuna nota de prensa, na que tamién presentó l’espectáculu ‘ULTRAinocencia’, de la compañía catalana loscorderos.sc, que va inaugurar la muestra, nun apueste “que combina teatru testual, teatru d’oxetos, danza y acrobacia”.

Los demás títulos que van vese n’Uviñúe son ‘La nueche delantre de los montes’, una adaptación de la obra escrita pol dramaturgu francés Bernard-Marie Koltès que s’estrena’l 13 de febreru por Microbiana Teatru; ‘Pequenos actos pseudorrevolucionarios’, de la compañía Ibuprofeno Teatro, “un espectáculu risible-políticu-absurdu basáu en testos escritos a partir d’un procesu d’investigación y creación colectiva”, que va estrenase’l día 20 de febreru; y finalmente ‘Bach’, el 27 de febreru, de la mano de la compañía Mal Pelo.