Portada Mundu Arqueólogos amateurs afayen docenes de sitios prehistóricos y romanos

Arqueólogos amateurs afayen docenes de sitios prehistóricos y romanos

by redacción asturnews

Arqueólogos amateurs vienen acabantes de asoleyar qu’afayaron nestos meses de confinamientu docenes de sitios prehistóricos y romanos. L’equipu, dirixíu dende la Universidá de Exeter, ta utilizando imaxes árees que depués oldea colos rexistros y los mapes históricos.

La pandemia del coronavirus atayó toles escavaciones prevista en munchos llugares del mundu, pero eso nun torgó que se siga investigando pa topar restos hasta agora desconocíos. Caminos, túmulos, granxes, canteres o edificaciones varies con cientos o miles d’años d’hestoria.

La base d’esti trabayu, centráu nel suroeste del Reinu Xuníu y empobináu por Chris Smart, de la Universidá de Exeter, fueron les imaxes llograes al traviés de LiDAR, un dispositivu que dexa determinar la distancia dende un emisor láser a un oxetu o superficie utilizando un fexe de lluz. Esta tecnoloxía utilízase tamién pa desenvolver mapes topográficos altamente detallaos con fotografíes que se llogren dende l’aire.

La vexetación y los edificios modernos pueden esaniciase, lo que dexa a los arqueólogos reparar la forma de la superficie de la tierra p’atopar los restos de movimientos antiguos. Una vegada detectáu dalgún puntu, oldear colos rexistros arqueolóxicos conocíos y colos mapes históricos.

Asina ye como se toparon dos víes romanes, alredor de 30 cortiles prehistóriques, unos 20 supuestos enterramientos prehistóricos, restos de cientos de granxes medievales, sistemes de campu y canteres. Y eso, según el investigadores, ye solo’l principiu, yá que esperen realizar munchos más descubrimientos nes próximes selmanes.

Los arqueólogos amateurs que participen nel proyectu aseguren tar “estelaos” a pesar de la dificultá que supon tener qu’aprender el nuevu sistema d’investigación. “Sabía qu’habría entusiasmu dientro del nuesu grupu de voluntarios, pero nun creo que fueren conscientes de la cuantidad d’afayos que diben realizar”, apunta Smart.

La idega ye que, cuando empiece’l desconfinamiento nel Reinu Uníu, puedan llevase a cabo estudio xeofísicos en dellos de los sitios apocayá identificaos. La tecnoloxía LiDAR yá se tuviera utilizando, por casu, pa revelar cientos de ciudaes y miles d’estructures en plena selva de Guatemala que confirmen que la civilización maya yera muncho más grande de lo que se creía hasta agora.

Tamién te podria gustar