Areces diz que’l PSOE ye’l que más tira pol asturianu pero niégase a da-y calter oficial

El presidente del Gobiernu del Principáu d’Asturies, Vicente Alberto Álvarez Areces, dexó-yos claro ayeri a los sos socios de gobiernu que nun apoyaría la oficialidá del asturianu si saliere victoriosu nes elecciones autonómiques del añu qu’entra. Negando les crítiques d’Izquierda Xunida a la falta de polítiques llingüístiques, Areces aseguró que’l PSOE ‘considerámonos los verdaderos impulsores d’esa política. Si hai dalguien que tiró pol asturianu ye’l PSOE y tolo qu’anguaño tenemos ye porque vien daquella’, refiriendose a los tiempos nos que yera director provincial d’Educación.

Vicente Álvarez Areces, actual presidente del Gobiernu asturianu, negó que la promoción del asturianu dende’l so gabinete fore escasa, tal y como-y echen en cara los sos socios de gobiernu d’Izquierda Xunida. ‘La so política ye dicir eso, pero nun se correspuende cola realidá’.

Recordándose de los tiempos nos qu’el yera director provincial d’Educación, cuando s’empezaron a poner clases voluntaries de llingua asturiana nes escueles, Areces aseguró que’l so partíu foi’l principal impulsor del usu, difusión y fomentu del asturianu. ‘Considerámonos como los verdaderos impulsores d’esa política dende hai decadez; ayudamos a que nun se pierda una parte importante de la nuestra cultura. Y si hai una fuerza política qu’apostó pol asturianu ye’l PSOE y tolo qu’anguaño tenemos ye porque vien daquella’, manifestó.

Sicasí, el presidente del Principáu dexó bien claro que, anque van seguir apostando pol fomentu del asturianu dende’l so partíu, nun van defender el reconocimientu llegal del mesmu na prósima reforma estatutaria, yá que, nes sos palabres, el nun ta d’acuerdu cola oficialidá de la llingua.