Araz LLibros presentóse como un nuevu proyectu nel ámbitu del ensayu en llingua asturiana

14 xunetu 10:28 2008 Imprimir

El Salón d’Actos del Centru Municipal de L’Arena, en Xixón, acoyó na tarde del xueves la presentación del nuevu proyectu editorial “Araz Llibros”, iniciativa que surde de la empresa asturiana Araz.net, responsable d’aplicaciones informátiques como’l “Iguador” o el “Diccionariu Web” de l’Academia de la Llingua Asturiana; amás de proyectos como’l buscador asturianu “Úlos”, “Asturshop” o’l diariu dixital “Asturies.com”.

En pallabres del direutor d’Araz Net, Fernando de la Fuente Trabanco, “Araz quier dar, con esti proyectu, un saltu de la Rede al papel”, saltu que coincide amás col décimu añu d’andadura de la empresa.

Nesti sen, Pablo Rodríguez Alonso, responsable editorial d’Araz Llibros, sorrayó’l calter anovador de la editorial no que cinca al campu d’aición nel que va a movese, l’ensayu n’asturianu. Alonso valoró mui positivamente’l llabor editorial asturianu y n’asturianu, pero reconoció que l’enfotu d’Araz Llibros será “enllenar el furacu que quedaba no tocante al ensayu”.

Asina, esplicó l’esfuerciu que ta faciendo la editorial por alcontrar testos de calidá que puedan resultar atractivos a un públicu ampliu, con temes asina mesmo interesantes pal conxuntu del públicu llector; presentando de siguío a los autores de los trés primeros llibros espublizaos por Araz: Faustino Zapico Álvarez, autor de “El nacimientu d’una nación. Historia de Sudáfrica”; Xabiel García Pañeda y Rubén Sánchez Antuña, autores de “Dos visiones asturianes de les nueves tecnoloxíes”; y David Guardado Diez, autor de “Llingua estándar y normalización llingüística”.

La editorial anunció, de magar setiembre, la presentación individual de caún de los manuales.

  Categories:
Loading Facebook Comments ...