Aprobaos los criterios pa pidir plaza nos centros educativos

Aprobaos los criterios pa pidir plaza nos centros educativos
07 marzu 09:55 2018 Imprimir

El Principáu vieno acabante aprobar los criterios pa pidir plaza nos centros educativos pal cursu 2018-2019, asina como los correspondientes bremos, que queden recoyíos n’unu resolvimientu que publica ayeri’l Boletín Oficial del Principáu d’Asturies (BOPA).

El resolvimientu tien como oxetivu regular el procedimientu d’almisión d’alumnáu en centros docentes non universitarios públicos y privaos alcordaos del Principáu d’Asturies. Asina, va aplicase nos centros qu’impartan enseñances de segundu ciclu d’Educación Infantil, Educación Primaria, Educación Secundaria Obligatoria y Bachilleratu.

L’almisión d’alumnáu va rexise cuando nun esistan places p’atender toles solicitúes por dellos criterios: tener hermanos matriculaos, padres o representantes llegales que trabayen nel centru, la proximidá de la casa o llugar de trabayu, rentes añales de la unidá familiar, ser familia numberosa, familia monoparental y acoyimientu familiar y discapacidá nel alumnu, padres o hermanos. Pa Bachilleratu, amás, va tener en cuenta l’espediente académicu.

El resolvimientu introduz novedaes. va dase más puntuación a les families numberoses, siguiendo la normativa estatal, y tamién a les monoparentales, a iniciativa del Principáu. Coles mesmes, auméntase la reserva de places pa necesidaes educatives especiales, nos primeros cursos de cada etapa, que pasa de dos a cinco.

Venir de un centru adscritu, tener necesidaes específiques de sofitu educativu, siguir programes deportivos d’altu nivel y altu rendimientu, cuestiones relatives al tresporte y simultanear estudios de Secundaria con enseñances profesionales de música y danza tamién son parámetros a tener en cuenta. Nesti últimu casu, van tener prioridá los alumnos pa la so almisión nel centru docente que-yos correspuenda. Tamién a quien participen en programes deportivos d’altu nivel y altu rendimientu y los que tengan que ser llevaos a otra localidá o conceyu va dáse-yos prioridá. Tener la casa familiar o llugar de trabayu na área d’influencia del centru va implicar ocho puntos y en zones estremeres, cinco.

El sortéu pa determinar la lletra que va marcar por qué apellíu s’entama a la de desempatar cuando dellos alumnos tengan la mesma puntuación va llevase a cabu’l día 12 d’esti mes, sigún indicó la Conseyería d’Educación, que tamién quiso dexar afitao que col citáu resolvimientu afacer a la llei sobro l’alministración electrónica.

  Categories: