Portada Hestoria Antonio Martínez presenta en Noreña “La Evacuación d’Asturies na Guerra Civil”

Antonio Martínez presenta en Noreña “La Evacuación d’Asturies na Guerra Civil”

by redacción asturnews
portada del llibru 1937

L’Asociación Cultural InfoNoreña organiza esti xueves 19 de payares la presentación de “1937. La Evacuación d’Asturies na Guerra Civil. Hestoria y Memoria”, el tercer llibru publicáu pol historiador noreñés Antonio Martínez.

L’actu de presentación d’esta nueva obra d’Antonio Martínez va ser na Casa Cultura “Severo Ochoa” de Noreña a partir de les 19,30 hores y va cuntar cola presencia del autor y representantes de la editorial Espublizastur.

La evacuación d’Asturies na Guerra Civil. Hestoria y Memoria ye una investigación sobre’l procesu desarrolláu en 1937 pol cual miles de persones son evacuaes d’Asturies de resultes de la guerra civil. En total, colos datos que s’espliquen nel trabayu, puede considerase’l volume mínimu de la evacuación nunes 57.000 persones y podría llegar hasta les 76.000.

La evacuación d’Asturies na Guerra Civil inda nun s’estudiara de forma monográfica y nesti trabayu analícense les causes, organización y desarrollu d’esti procesu desenrrolláu ente xunetu y ochobre de 1937 y que se relaciona col desenvolvimientu bélicu, la cayida del Frente Norte y les migraciones producíes pola Guerra Civil.

El llibru estructúrase en trés grandes partes: Una primera, onde s’analicen les emigraciones que produz la guerra civil y la llegada de población refuxada a Asturies; una parte central sobre la evacuación dende Asturies, la so finalidá, el so desarrollu y cómo s’organiza; y una parte final onde s’espón una visión xeneral de la política sobre población refuxada en Francia y en Cataluña.

Antonio Martínez Fernández (Neda, 1980) ye Llicenciáu n’Hestoria y Máster n’Hestoria y Analís Sociocultural pola Universidá d’Uviéu. Anguaño realiza’l Doctoráu n’Investigaciones Humanístiques, na Llínea d’Investigación d’Hestoria y Estudios Socioculturales, tamién na universidá asturiana.

La Evacuación d’Asturies na Guerra Civil. Hestoria y Memoria ye’l so tercer llibru, enantes, en 2009, asoleyara Exiliu Asturianu (1937-1939) y, en 2013, Noreña y la sidra. Apuntes sobre la hestoria sidrera d’un conceyu asturianu col qu’algamó’l Premiu Emilio Trabanco 2012. Agora, con esti llibru sobre la evacuación d’Asturies na Guerra Civil torna a la temática de la so primer publicación, asoleyando la que fora la so Tesis Fin de Máster dirixida pola profesora Carmen García García.

Tamién te podria gustar