Portada Hestoria Antonio Martínez estudia l’Exiliu Asturianu ente 1937 y 1939 nun llibru de recién espublización

Antonio Martínez estudia l’Exiliu Asturianu ente 1937 y 1939 nun llibru de recién espublización

by asturnet

La editorial Espublizastur ta acabante asoleyar la primer investigación del hestoriador Antonio Martínez (A Coruña,1980), “Exiliu Asturianu (1937-1939)”, un llibru nel que se fai analís de la conformación del exiliu asturianu, dende la so salida d’Asturies hasta la conformación del denomáu “exiliu permanente”. Nel volume danse cifres actualizaes, cuantificación la magntitú y apurriendo datos nuevos abondo, consiguíos al traviés del trabayu d’archivu y nel estudiu de la bibliografía esistente que da como resultáu una investigación rigurosa que si bien “nun ye definitiva” ye la aportación más completa pal conocimientu y l’estudiu d’esti procesu que tuvo como protagonistes a miles d’asturianos y asturianes.

Exíliu Asturianu (1937-1939) ye un viaxe al traviés d’estes páxines nel que’l llector pue dir viviendo l’exiliu asturianu na so primer fase a la vez que descubre la historia escaecida, poco estudiada, de miles de persones, d’asturianos y asturianes que fueron víctimes de la Guerra Civil. Estos dos años “interminables” son fundamentales pa comprender l’exiliu nel so conxuntu, les sos caracteristiques, composición…

El llibru encóntase dientro de la colección ‘Investigación’ qu’Espublizastur quier ufrir a los investigadores p’asoleyar los sos trabayos en llingua asturiana, y qu’entama con esti volume.

Antonio Martínez Fernández (Neda, A Coruña, 1980) ye Llicenciáu n’Hestoria pola Universidá d’Uviéu y Profesor de Ciencies Sociales. Si bien esti ye’l so primer llibru, Martínez tien espublizaos dellos artículos históricos na revista “N’AST. Cartafueyos d’ensayu”, como ‘Unes notes sobre los refuxaos y la política sobre población refuxada n’Asturies na Guerra Civil (1936-1937)’ o ‘El Centru Asturianu de Cataluña na guerra civil ‘, una reseña n’Erada. Revista d’Historia Contemporanea que saldrá nel númberu 3 o delles collaboraciones n’otres revistes como La Sidra.

Tamién te podria gustar