Antonio Banderes cree que’l so papel en Indiana Jones: “Ye casi un cameo”

Hai yá un tiempu que salió a la lluz qu’Antonio Banderes formaría parte de la repartida de la nueva película de Indiana Jones. Sicasí, pocos detalles salieren a la lluz sobro’l papel qu’interpretaría’l malagueñu na quinta entrega de la saga. Agora, foi’l mesmu actor quien apurrió daqué de lluz nuna entrevista col mediu especializáu Collider.

“El mio papel ye bien pequenu, casi un cameo. Ye solo un amigu de Indiana Jones al que busca porque precisa daqué d’él na trama. La mio apaición dura bien poco tiempu” concretó Banderes, quien añedió qu’igualmente ta “bien contentu” de formar parte d’una saga que “yá ye hestoria del cine”.

Banderes aprovechó pa dedicar bones palabres al so compañeru de set, Harrison Ford, pos aseguró que ye “un caballeru dientro y fora del plató”. “Tengo que dicir que lo pasé perbién con él. Compartí delles cenes y un pocu de tiempu xuntos”.

La cinta, que se va estrenar en xunu de 2023 y qu’enagora nun tien títulu oficial, supon el regresu de Harrison Ford a unu de los sos papeles más icónicos, el del míticu arqueólogu qu’alcuentra oxetos de gran relevancia histórica, como l’Arca de l’Alianza o’l Santu Grial. Al pie de dambos actores, tamién van protagonizar la cinta Mads Mikkelsen, Boyd Holbrook, Shaunette Renée Wilson, Thomas Kretschmann y Phoebe Waller-Bridge, la ceadora de la esitosa serie Fleabag.

Enagora, desconozse l’argumentu del filme, el primeru de la saga que nun va tar dirixíu por Steven Spielberg. L’encargáu de sacar la producción adelantre esta vegada va ser James Mangold. Quien sí que va repitir nel so cargu va ser el compositor John Williams, quien yá adelantró en septiembre ún de les temes de la banda sonora, Helena’s Theme.

Los fans de la saga tán sorielles pos esta va ser la última aventura de Indiana Jones na gran pantalla. Sicasí, la plataforma Disney+ adelantró que ta trabayando nuna serie paralela basada n’Helena, l’afiada del arqueólogu, quien tomaría’l relevu como nueva protagonista.