Portada Lliteratura Antònia Vicens algama’l Premiu Nacional de Poesía 2018 por ‘Tots els cavalls’

Antònia Vicens algama’l Premiu Nacional de Poesía 2018 por ‘Tots els cavalls’

by redacción asturnews

La narradora y poeta mallorquina Antònia Vicens llogró esta selmana pasada’l Premiu Nacional de Poesía 2018 que concede’l Ministeriu d’Educación y Cultura pol so llibru “Tots els cavalls” escritu en catalán. Una obra que d’acordies con xuráu amuesa “una vocación poética que contempla toa una vida al traviés del cribu d’una espresión seca, dura, inquieta y acandilante”.

El xuráu que falló’l premiu, dotáu con 20.000 euros, tuvo presidíu pola directora xeneral del Llibru y Fomentu de la Llectura, Olvido García Valdés, y formáu por Javier Pascual, Darío Xohán Cabana, María Lourdes Otaegi, María del Vinyet Panyella, María Angeles Pérez López, Guadalupe Grande, Juana Castro, Pilar Bellu, Ana Isabel Zamoranu, Álvaro Valverde y Julio Martínez Mesanza y Ánxeles Mora Fragosu, los dos últimos galardonaos.

Antònia Vicens (Santanyí, Mallorca, 1941) cuenta con una llarga trayectoria lliteraria y publica tantu novela como poesía. En 1965 recibió la primer reconocencia pola so obra ganando’l concursu lliterariu de Cantonigròs cola escoyeta de relatos “Banc de fusta”. Y en 1967 llogró’l Premi Sant Jordi pola novela “39º a l’ombra”. Amás tien d’otres noveles, como “La Santa”, “Terra seca”, “Febre alta”, “Lluny del tren”, “Ungles perfectes” o “Ànima de gos”, y publicó llibros de cuentos, recoyíos nel volume “Tots els contes”, narrativa xuvenil. En 2009 publicó’l so primer llibru de poesía “Lovely”, al que siguieron “Sota el paraigua el crit” (2013), “Fred als ulls” (2015) y “Tots el cavalls”.

En collaboración con Josep Maria Llompart escribió “Vocabulari privat”, un llibru de memories. Tien obra traducida al alemán y el castellán. Foi nomada presidenta en funciones de la Associació d’Escriptors en Llengua Catalana,en 1998, entidá de la que tamién ye vicepresidenta nes Isles Baleares ente 1997 y 2004. En 2016 ye nomada socia d’honor d’esta asociación. Esti mesmu añu recibió’l Premiu Nacional de Cultura de la Generalitat de Catalunya.

Ente los galardones que recibió destaquen: Sant Jordi, Ciutat de Palma, Constantí Llombart, Ramon Llull. Amás recibió la Creu de Sant Jordi y el Premi de Cultura de la Generalitat de Catalunya pola so trayectoria.

Tamién te podria gustar