ANPE presenta un decálogu de bon usu del móvil nes redes sociales y centros educativos

ANPE presenta un decálogu de bon usu del móvil nes redes sociales y centros educativos
11 febreru 09:13 2020 Imprimir

Aumenten les denuncies de el profesores pol mal usu del móvil nos centros y darréu d’ello nel sindicatu ANPE atalantaron importante empecipiar una campaña para’l so bonu usu y reclama a la conseyería un protocolu rexonal sobro’l so emplegu que vieno acabante presentase col entamar d’esti mes de febreru.

Alumnos que suplanten la identidá d’un profesor y abren un perfil falsu d’él nuna rede social. Padres que bilordien a dalgún docente nel grupu de WhatsApp. Rumores estendíos n’internet que se dan como ciertos. Inclusive espardimientu de fotografíes o vídeos ensin el consentimientu del comenenciudu. Los exemplos sobro’l mal usu del móvil y les redes sociales na redolada educativa son munchos, anque la mayoría nun lleguen a concretase en denuncies. Por eso, el sindicatu ANPE punxo en marcha xuna campaña pensada espresamente pa los estudiantes de Secundaria, Formación Profesional y Bachilleratu, pa concenciar sobro’l «bon usu del móvil y les redes sociales».

La campaña basase nun decálogu, con conseyos bien cenciellos y bien claros que prácticamente se resumen nel postreru: «Dedica menos tiempu al móvil y más a les relaciones personales». El decálogu alvierte de qu’hai comportamientos, como l’espardimientu d’imaxes íntimes o ofensives, faltar o bilordiar, «son delitos bien graves».

Nun ye la primer vegada qu’ANPE se refier a estes cuestiones, tal que recordaron el presidente del sindicatu, Gumersindo Rodríguez, y la coordinadora del serviciu de Defensor del Profesor, Montserrat Fernández. De mano, porque este mesmu serviciu detectó nos últimos años l’aumentu de les denuncies nesti sentíu. Nel últimu informe, del cursu 2018-2019, rexistráronse cinco casos d’usu de les nueves tecnoloxíes. Sumando cursos anteriores son quince les denuncies, anque Rodríguez llamentó que l’ausencia d’un protocolu rexonal d’actuación nos centros educativos ante estos casos fai que les víctimes «escasamente entamen acciones llegales». Poro, los casos son munchos más de los denunciaos oficialmente.

ANPE va distribuyir el decálogu en centros, redes sociales y na páxina web del sindicatu, coles mires de «ameyorar la convivencia nes aules». Gumersindo Rodríguez apuntó directamente a la Conseyería d’Educación del Principáu, a la qu’acusó de faer «desdexación de funciones», yá que n’Asturies nun ta reguláu l’usu del teléfonu móvil nes aules, sinón que dexa en manos de los mesmos centros la decisión al respeutu.

El sindicatu docente repitió ayeri’l so compromisu con «la convivencia escolar, requisitu fundamental del procesu d’enseñanza y d’aprendizaxe, que tien como pilastres el respetu, la non violencia, la tolerancia y el bienestar emocional de tola comunidá educativa p’algamar l’ésitu educativu», esplicó Montserrat Fernández. «ANPE va siguir denunciando la lacra de violencia y acoso escolar nos centros, apostando poles bones práctica».

El decálogu

  1. Nun utilices el móvil en clase, sacante cuando lo pida’l to profesor.
  2. Nun fotografies nin grabes a naide ensin el so consentimientu.
  3. Nun facer risión a profesores o compañeros con stickers, gifs…
  4. Espublizar imaxes íntimes o ofensives, faltar o bilordiar son delitos bien graves.
  5. Si sufres situaciones d’acoso o violencia escolar, fala colos tos profesores y/o la to familia.
  6. Nun sías cómpliz de situaciones d’acoso o violencia escolar. Denúncialo.
  7. Nun aceptes a cualesquier nes tos redes sociales.
  8. Nun creas tolo que llees. Sé críticu y reflexivu.
  9. Respeta les diferencies. Piensa antes de publicar y esprésate con respetu.
  10. Dedica menos tiempu al móvil y más a les relaciones personales.
  Categories: