ANPE denuncia al Principáu por escluyir a docentes na progresión de la carrera profesional

El sindicatu educativu ANPE decidió llevar al Gobiernu asturianu énte los tribunales por escluyir a los docentes de la progresión na Carrera Profesional. Nuna nota de prensa carguen contra l’anteproyectu de Llei del Principáu d’Asturies de midíes en materia de función pública de resultes de la prórroga presupuestaria.

El citáu anteproyectu recueye nel Artículu 2 el Complementu de carrera profesional, la regulación del complementu de carrera profesional destináu a retribuir la progresión alcanzada pol funcionariu dientro del sistema de carrera horizontal y afita la cuantía de la segunda categoría a tolos funcionarios Públicos del Principáu d’Asturies, sacante a los funcionarios docentes.

El sindicatu entiende qu’esta norma evidencia l’olvidu del Principáu escontra los docentes. Con esta midida, dixeron, «el Principáu favorez una discriminación flagrante del personal docente y establez distintes categoríes de trabayadores en función de la Conseyería na qu’empresten los sos servicios».

Por ello, ANPE esixó que se dean los pasos necesarios» pa la efectiva incorporación del personal docente al segundu nivel del Plan d’Evaluación y dótese la partida presupuestaria necesaria, al igual que s’inclúi pa otros funcionarios del Principáu.

El sindicatu recordó qu’esta ye una adhesión voluntaria, y que la evaluación del desempeñu de la xera docente, casu de ser superada, xenera un derechu económicu como complementu de productividá. Anguaño, esplicaron, los docentes del Principáu d’Asturies «escarecen de regulación dalguna y nun se preve la instauración d’una carrera horizontal, d’una carrera vertical, de promoción interna vertical y promoción interna horizontal, modalidaes toes elles, de la carrera profesional».