ANPE critica a Educación na vuelta a les aules

ANPE critica a Educación na vuelta a les aules
13 xunetu 08:43 2020 Imprimir

El sindicatu independiente ANPE foi dafechamente críticu polo que calificó esta semana de «inoperancia» de la Conseyería d’Educación del Principáu pa programar la vuelta a les aules en septiembre.

nuna nota de prensa, dende ANPE inciden en que «el retrasu en tomar de decisiones respecto del cursu 20-21 empieza a ser insostenible». «Equipos directivos, families y profesores desconocen cómo va ser la vuelta al cole en septiembre», añeden.

P’ANPE, la vuelta a les aules nel mes de setiembre «tien de garantizar toles midíes preventives frente al covid-19 y, al empar, tien que ser compatible col procesu d’enseñanza-aprendizaje», con un modelu «que garantice’l máximu d’hores presenciales posibles». Ente otres propuestes, el sindicatu plantega que «l’anunciada inversión n’Educación tendría de destinase a diseñar un plan de remodelación de los centros educativos p’afaelos a les nueves midíes preventives».

En concretu, ANPE propón dotar a los centros educativos d’enfermera escolar; aprovir de material de protección ya hixene; llimpiar y desagafar delles vegaes al día; distribuyir los espacios pa caltener el distanciamientu físicu; xestionar les borrafes nel centru. Tamién apunta la necesidá de «reforzar y aumentar les plantiyes docentes» cuidao que «les midíes de distanciamientu físicu obliguen a baxar la ratio y a desdoblar les aules».

Coles mesmes, defende’l sindicatu «llevar a cabo planes específicos de sofitu y refuerzu educativu col alumnáu que nun pudo realizar un procesu d’enseñanza-aprendizaje fayadizu del tercer trimestre del cursu 2019-20»; según la puesta en marcha de «un plan de digitalización».

ANPE sollerta de que «l’entamu de cursu puede ser un caos organizativo, porque los trabayos preparatorios, que de normal se faen en xunetu, d’organización d’espacios, horarios d’alumnos y profesores, ratios, etc, una vegada conocida la matrícula de los centros, tán toos ensin faer, pa desesperación de los equipos directivos».

  Categories: