Portada Educación ANPE cifra en 928 les places a convocar nes oposiciones de maestru en 2019

ANPE cifra en 928 les places a convocar nes oposiciones de maestru en 2019

by redacción asturnews

El sindicatu d’enseñanza ANPE cifra en 929 les places que tendríen de convocase nes oposiciones de maestru que se preve va convocar el Principáu l’añu que vien. Una cifra que resulta de sumar les places consolidaes de la ufierta de 2017 (528) y les 400 xubilaciones que se preven anguaño.

ANPE, que calificó de «fadia» les tasa d’interinidá n’Asturies, qu’afecta al 30% de la plantiya docente, recordó que’l Gobiernu rexonal tien d’anunciar la OPE de maestros antes del 15 de payares, en función d’un alcuerdu suscritu ente sindicatu y Principáu. Y defendió que la convocatoria d’emplegu va contribuyir a amenorgar esa tasa, al igual que creen facer les oposiciones de Secundaria d’anguaño, «nes que nueve de cada diez places fueron llograes por interinos». Amás, reclamó «responsabilidá» al restu de les organizaciones sindicales «pa dir toos a una, non como asocedió cola ufierta pública d’emplegu de 2018» que solo ANPE sofitó, «lo que dexó sacar alantre les oposiciones de Secundaria y que güei haya 400 funcionarios más trabayando n’Asturies».

El sindicatu facía estes valoraciones dempués de que la Conseyería d’Educación diera a conocer el pasáu día 24 les necesidaes de profesoráu del sistema educativu na so primer convocatoria d’interinidaes pa esti cursu. De les 3.156 places ufiertaes, 1.838 correspuende al cuerpu de maestros, 1.021 a Secundaria, 161 a profesores técnicos de Formación Profesional, 21 a la Escuela Oficial d’Idiomes, 77 a música y artes escéniques, 32 a artes plástiques y diseñu y seis a maestros de taller d’artes plástiques y diseñu. Nel cuerpu de maestros, el númberu de places per especialidá ye de 359 pa Infantil, 4 pa francés, 118 pa música, 123 a Audición y Llinguaxe, 257 pa inglés, 240 pa Pedagoxía Terapéutica, 400 pa Primaria y 176 pa Llingua.

Tamién te podria gustar