Ángel Domingo recibe xunta Fred Morrison el Macallan que lu afita como revelación del añu folk

01 agostu 23:40 2004 Imprimir

El gaiteru d’Avilés Ángel Domingo recibía na madrugada’l llunes primeru d’agostu la que ye la mayor cualificación que pue algamar un gaiteru asturianu: el Troféu Macallan, güei nomáu Mac Crimmon, col que’l Festival de Lorient premia al meyor intérprete de gaita asturiana y gallega. Y facíalo a la vera’l ganador, otra vuelta esti añu, del concursu de gaita escocesa, l’inmeyorable Fred Morrison, nun actu nel que tolos gaiteros presentes quixeron rendir homenaxe a Jairo, al gaiteru que mos dexara nestos caberos meses y que como facía alcordanza Marco Antonio Guardado, “l’añu pasáu taba equí con nós disfrutando con gayola del añu d’Asturies”.

Marco Antonio Guardado nun podía reprimir l’alcordanza a Jairo nel minutu de silenciu que’l Festival-y dedicó a un gran gaiteru que mos dexó mui pronto y al qu’entá recordamos tolos que coincidimos con elli nes nueches de Lorient y nes xornaes intenses que se pasen equí d’escenariu n’escenariu.

Fred Morrison tamién s’alcordó de Jairo nes curties declaraciones que fizo a Asturnews acabante de finar l’actu d’entrega de premios, nes que nun dexó pasar el so gran cariñu por Asturies, “una tierra con unes xentes y una cultura que me presten muncho”, acertó a dicir el mayestru gaiteru nun asturianu entemecíu col castellán que dexa bien a les clares el so interés por Asturies y lo asturiano que pudo amuesar na so reciente visita al Principáu.

De sutaque se-y ufiertó esti homenaxe a Jairo, Ángel Domingo amoesó nidiamente por qué algama esti añu el reconocimientu en Lorient, con una interpretación con munchu ciñu y meyor sentíu rítmicu y unos floreaos colos que dexó plasmaos a otros compañeros gaiteros que persaben lo que ye templar l’instrumentu.

Suplementu d’Asturnews sobro’l Festival de Lorient 2004

  Categories:
Loading Facebook Comments ...