Andrés Fernández, Damián Barreiro y Gonzalo G. Barreñada ganen los premios del Principáu

Andrés Fernández, Damián Barreiro y Gonzalo G. Barreñada ganen los premios del Principáu
25 setiembre 14:17 2022 Imprimir

Andrés Fernández Menéndez, Damián Barreiro y Gonzalo G. Barreñada algamaron los premios Enriqueta González Rubín de Narrativa moza n’asturianu, Máximu Fuertes Acevedo d’ensayu y Xosefa Xovellanos» de Novela n’asturianu, respeutivamente, sigún se foi conociendo a lo llargo d’esti mes de setiembre. Y Blanca Fernández Quintana vieno a completar la serie col XV Premiu «María Josefa Canellada» de Lliteratura Infantil y Xuvenil esta mesma selmana.

Andres FernandezAndrés Fernández Menéndez (Argame, 2003) ye’l ganador de la segunda edición del premiu Enriqueta González Rubín de Narrativa moza n’asturianu, que promueve la Conseyería de Cultura, Política Llingüística y Turismu. La so novela 1929 reconocióse pol xuráu del gallardón porque “escrita dende un enfoque interseccional, usa con aciertu les ferramientes narratives, manexando con oficiu les distintes perspectives temporales y definiendo bien a los distintos narradores”.

Esti escritor mozu construye un rellatu ucrónicu, reconstruyendo con lóxica acontecimientos históricos que nun asocedieron, y describe una Asturies qu’a lo llargo del sieglu XIX ta sometida al xugu del Reinu Uníu y vive una revolución lliberadora a primeros del sieglu XX.

El premiu Enriqueta González Rubín de Narrativa moza n’asturianu ta dotáu con 3.000 euros. El Gobiernu d’Asturies impulsó’l gallardón nuevu nel 2021 pa reconocer el talentu de la producción lliteraria de les voces nueves de la lliteratura en llingua asturiana. Na primer edición recayó na escritora Blanca Fernández Quintana.

Andrés Fernández Menéndez naz n’Argame (Morcín) nel 2003 y cursa’l grau d’Estudios Clásicos y Románicos na Universidá d’Uviéu. Ye autor de la novela 1809: cartes de la revolución de Trubia (Ediciones Radagast, 2022), amás de dellos rellatos como “El Cantar de Suaro Caínez”, col que ganó’l IV Concursu de rellatos de Morcín en categoría xuvenil.

Damián Barreiro

damianBarreiroDamián Barreiro ganó la ventesima octava edición del premiu Máximu Fuertes Acevedo d’ensayu en llingua asturiana que concede la Conseyería de Cultura, Política Llingüística y Turismu cola obra titulada Asturianía kitsch: decálogu de la cultura pop ástur. El gallardón ta dotáu con 6.000 euros.

El xuráu destacó que’l trabayu de Barreiro “analiza la cultura asturiana moderna dende una perspectiva novedosa, percorriendo los sos iconos con datos nuevos sobre temes y personalidaes que’l públicu va reconocer y va sentir como propios”. Amás, el fallu resalta “l’amenidá y l’interés” del testu.

Nesta edición del Máximu Fuertes Acevedo, y cola presidencia del director xeneral de Política Llingüística, Antón García, el xuráu tuvo integráu poles filólogues Marta López Fernández y María Cueto Fernández, el filólogu Jorge Arturo Sierra Álvarez, la historiadora Verónica Fueyo Alcedo, y Ramón d’Andrés Díaz, profesor universitariu y ganador de la edición pasada del gallardón. Laura Marcos Domínguez, filóloga del serviciu de la Dirección Xeneral de Política Llingüística, actuó como secretaria.

Damián Barreiro Maceiras (1984) ye llicenciáu en Periodismu pola Universidá del País Vascu (UPV), máster en Xestión Cultural pola Universidá Oberta de Catalunya (UOC) y especialista universitariu n’Asturies. Espaciu, Patrimoniu, Historia y Cultura pola Universidá d’Uviéu.

Enantes, foi ganador del Premiu Máximu Fuertes Acevedo nel 2014 y 2018 con Caleya Sésamu: el papel de la televisión na tresmisión interxeneracional de la llingua y Asturploitation, amás d’otros premios d’investigación con ensayos sobre llingua asturiana y cultura audiovisual. Trabayó nes redacciones d’Asturies.com y Les Noticies y collaboró con medios como la RTPA, onde foi guionista de programes divulgativos sobre lliteratura, música y historia d’Asturies. Anguaño trabaya na redacción d’Europa Press Asturias. Amás ye responsable de la canal de Youtube Horros & Frixuelos, onde analiza les conexones ente la cultura asturiana y la cultura pop contemporánea.

Gonzalo González Barreñada

Foto Gonzalo Barreñada (1)Gonzalo González Barreñada (Sotrondio, 1973) fíxose col Premiu «Xosefa Xovellanos» de Novela n’asturianu gracies a El viaxe del cacique, una novela histórica con elementos del xéneru de caballeríes.

El xuráu destacó la «solidez del testu y el gran procuru formal qu’ayuda al desenvolvimientu exitosu de los personaxes». El Premiu «Xosefa Xovellanos», convocáu pola Conseyería de Cultura, Política Llingüística y Turismu, ta dotáu con 6.000 euros y la publicación de la obra ganadora.

El xuráu d’esta 43 edición del gallardón tuvo presidíu pol director xeneral de Política Llingüística, Antón García, y integráu por José Ángel García Fernández, ganador de la edición anterior; Laura Rodríguez Solís, escritora; Natalia González Menéndez, escritora y llibrera; Marcos Martínez Fernández, filólogu y trabayador de l’Academia de la Llingua Asturiana, y Liliana Díaz Gómez, profesora. Actuó como secretaria Lourdes Álvarez, filóloga adscrita a la Dirección Xeneral de Política Llingüística.

Gonzalo González Barreñada (Sotrondio, 1973) ye llicenciáu en Xeografía y Historia y especializáu n’Historia del Arte. Ente les sos obres publicaes destaquen La casa de Xuan Buelga; Hestories de Burgundu; Hestoria ensin contar; El pesu de la lluz y El llar n’orde, obra esta última cola que ganó’l Premiu «Xuan María Acebal» nel añu 2019.

  Categories:
Loading Facebook Comments ...