Andecha pide a mediu Ambiente que se tomen medíes urxentes cola viesta de texu del Sueve

Andecha Astur ta acabante d’empobinase al Conseyeru de Mediu Ambiente pa que la viesca de texu del Sueve, con 8.000 texos, la mayor d’Europa, sea declarada RESERVA NATURAL, d’alcuerdu cola so riqueza’n vexetación, fauna, flora y colos sos valores paisaxísticos escecionales, tomando medides urxentes de conservación y recuperación.

Andecha tamién pide que se cambie y actualice la redación del PORNA y dellos documentos oficiales no que cinca a la viesca de texu del Sueve, adatándola a la realidá.

Sigún asoleyaba esti día Andecha nuna nota de prensa, un buen númeru d’asociaciones y publicaciones relacionaes con la protección del mediu ambiente nun se cansen de pedir protección pala viesca de texu del Sueve, llamando poderosamente l’atención qu’el Principáu d’Asturies nin siquiera reconoza la so existencia. Ye un fechu indiscutíble que nel Sueve esisten mas de 8.000 texos,y que forman la mayor viesca de texu d’Europa, lo que yos da un valir esceicional, costatándose al mesmu tiempo qu’esti espaciu tá degradáu y menazáu poles plantaciones d’ocalitos, la presión urbanística y la falta de regulación de la población y de l’actividá de gamos y xabalinos.

La redación d’anguañu del PORNA y otros documentos oficiales del Principáu (páxina Web incluyía) limítase a asitiar el texu nel caberu llugar de la vexetación del Sueve, ensin reconocer dafechu la esistencia de l’arboleda. Copiamos literalmente esta información del PORNA sobre el Paisaxe Protexíu de la Sierra del Sueve: “Lo mas destacable de su vegetación son las formaciones arboladas del interior de la sierra en el extremo norte. Se trata de bosquetes en los que dominan los acebos y las espineras, que aportan la estructura básica, pero que contienen también otras especies como hayas, fresnos, abedules, avellanos, olmos, arces y tejos, de cuya unión resultan unas formaciones muy diversas que resaltan la calidad del paisaje”.