Andecha denuncia l’enmazcaramientu que supón la campaña “xugamos nel mesmu equipu”

Andecha denuncia l’enmazcaramientu que supón la campaña “xugamos nel mesmu equipu”
14 avientu 08:00 2015 Imprimir

“Que’l “Principado”, los mesmos que reprimen la llingua asturiana y mos ñeguen la Oficialidá, faiga campañes aparentemente na so defensa resulta inaceutable dafechu” critica Andecha Astur pola campaña desenvuelta ente los equipos de fútbol astures.

Y nun comunicáu asoleyau no postrero de la selmana pasada afita que “tien d’enartase na política de xestos ensin conteníos que conmplementa la política llingüística d’amiguismu y redes clientelo-familiares a la que mos tienen avezaos”.

Andecha Astur quier denunciar la ca vuelta más evidente táutica del “Principado”, d’enmazcarar “con xestos les sos polítiques represives en materia llingüístico, percuriando que nun vaigan acompangaos de conteníos riales, escomenzando pola reconocencia de la Oficialidá de la llingua nacional d’Asturies”.

Nesi sen, lo que pretende’l “Principado” pa esta organización nacionalista “ye tracamundiar el problema principal, la falta d’Oficialidá y per ende la non reconocencia d’un drechu humanu tan ellemental comu a falar llibremente la propia llingua nel propiu país, entrando nuna dinámica na que lo que se trate ye de l’asignación de la cuantía designada pa la llingua, les aídes y sovenciones concedíes d’alcuerdu a la avezada política llingüística del PSOE d’amiguismu y redes clientelo-familiares, y a la fin, con campañes publicitaries meyor o pior encadarmaes, pero que nun suponen denguna meyora de la situación llegal de la nuesa llingua”.

Ello asina, la campaña entamada pola Conseyería de Cultura “Col asturianu xugamos nel mesmu equipu” supón pa Andecha “una auténtica burlla a la sociedá asturiana, entamando porque l’emplegu que fai la mesma Conseyería de Cultura de la llingua asturiana nun pasa d’aneudóticu, pero sobro too porque son los mesmos que reprimen la llingua asturiana los que pretenden presentase comu los sos defensores y obviar la custión principal dende la qu’entamar a normalizar democráticamente la situación de la llingua asturiana: la Oficialidá”.

Metantu y non, ye pervaloratible la collaboración de los clús esportivos asturianos, y pon n’evidencia una vuelta más “que’l principal enemigu de la llingua asturiana ye precisamente el “Principado”. Por eso tien que quedar bien nidio que nun xugamos nel mesmu equipu. Mentes nun hebia Oficialidá, el “Principado” ye l’agresor, l’enemigu…, por munchu que quiera amarutase con pelleya d’oveya”.

Loading Facebook Comments ...