Andecha Astur y Izquierda Asturiana anuncien la formación de llistes conxuntes nes elecciones municipales

Les organizaciones amuesaron el so interés pa qu’esti prealcuerdu seya’l primer pasu de la fusión de la esquierda nacionalista. L’alcuerdu tien como fin evitar la duplicidá de llistes de la esquierda nacionalista y ufrir una alternativa asturiana, d’esquierda, verde y non clientelar.

Germán Abad, Secretariu d’Organización d’Andecha Astur y Faustino Zapico, Secretariu Xeneral d’Izquierda Asturiana anunciaron que les dos formaciones algamaron un principiu d’alcuerdu pa concurrir conxuntamente a les elecciones municipales.
Los responsables de les dos organizaciones consideren que “l’alcuerdu ye mui positivu porque favorez y reflexa de forma práctica la xuntura de la esquierda nacionalista, amás de tornar la duplicidá de candidatures y la competencia ente llistes con programes mui asemeyaos que van presentar unes propuestes en clave asturiana, verde y d’esquierda”.
Los llíderes políticos d’Andecha Astur y Izquierda Asturiana consideren qu’el pasu tomáu yera una “demanda d’un sector de la población que s’afaya güérfano d’una propuesta diferente de facer política que s’afinque na concepión d’Asturies como un país amu del so futuru, y de la defensa insobornable del so mediu ambiente y de la so identidá”.

Nel comunicáu d’anuncia del alcuerdu electoral les dos formaciones dediquen unes llinies a la situación política de los partíos con representación na Xunta Xeneral del Principáu. Asina les dos formaciones coinciden na valoración negativa de les opciones estatales; “entamando per un Partido Popular encalláu na derecha neolliberal más tradicional, que nun pue en nengún casu ser garantía d’un gobierno progresista no social y no económico” mentres que per otru llau consolídase’l pautu anunciáu ente PSOE-IU-BA-LV, que les formaciones d’esquierda nacionalista cuenten como “el segundu actu d’una comedia na que s’empapueta los electores con propuestes d’esquierdes que s’escaecen o s’aparquen cuando quita’l maquillaxe de la campaña electoral y llega al gobiernu” y nel que “los partíos d’esi pautu que defenden supuestes alternatives asturianistes y verdes nun son más que piones al serviciu de les polítiques d’un presidente nefastu como Areces”.

El principiu d’alcuerdu ta ensin ratificar poles organizaciones. El pactu electoral contemplará les diferentes fórmules de repartu de les llistes electorales en función de la representación de cada partíu nos diferentes conceyos. Asina mesmo Andecha Astur y Izquierda Asturiana mantienen abiertu esti pactu a otros colectivos que tá negociando actualmente.