Andecha Astur vuelve a pidir la supresión de la Feria d’Abril de L’Infiestu

Dende la organización política Andecha Astur creen que “l’entamu de la Feria d’Abril de Sevilla en L’Infiestu nun ye casual, nin muncho menos deriváu d’una demanda popular, sinón qu’obedez a una determinada concepción ideolóxica, de marcáu calter españoliegu”. P’AA la celebración busca sofitar un “procesu d’homoxeneización cultural” que va suponer p’Asturies “consecuencies pergraves, a mediu o llargu plazu, consistentes na perda d’identidá comu pueblu y desapaición de les tradiciones culturales asturianes”.

N’Andecha Astur tamién opinen que la cellebración d’una Feria d’Abril en L’Infiestu “ye’l determín políticu más vergoñosu, ablucante y antiasturianu, tomáu pol Ayuntamientu Piloña, a lo menos no que cinca a la estaya cultural”.

P’afitar la so protesta y facela llegar al Ayuntamientu, Andecha Astur presentó una moción, con fecha 16-04-2010 y númberu de rexistru d’entrada 1.503, na que se pide al Plenu Municipal qu’apruebe “la supresión, yá, de la Feria d’Abril de Sevilla en L’Infiestu” y que-y “dea vuelta a la situación aniciada convirtiendo al conceyu de Piloña en capital d’asturianía sostituyendo la Feria d’Abril de Sevilla por una Feria de l’Asturianía y Festival Intercélticu, de forma que se faga mediante un reequilibriu territorial en llugares estratéxicos del conceyu (non sólo en L’Infiestu, sinon tamién en Villamayor, Sevares, etc.) col enfotu de xenerar beneficios de forma equilibrada ente tolos habitantes. Ente otres munches actividaes podríen desendolcase les que vienen darréu: charres y esposiciones sobre cultura, hestoria y lliteratura d’Asturies; amuesa y/o competición de deportes autóctonos; amueses de la nuestra gastronomía y de les races d’animales autóctones; conciertos de música tradicional asturiana, etc”.

Pa sofitar la presentación d’esta moción, y pidir la so aprebación, Andecha Astur va llevar alantre nos prósimos díes una campaña de recoyía de firmes ente los vecinos y vecines del conceyu, firmes que tamién se presentarán nel Ayuntamientu Piloña.