Portada Política Andecha Astur denuncia la “postura pasiva y claudicante” d’UGT y CCOO sobre l’enseñu del asturianu

Andecha Astur denuncia la “postura pasiva y claudicante” d’UGT y CCOO sobre l’enseñu del asturianu

by asturnet

La formación política Andecha Astur camienta positiva la manifestación d’esti sábadu, yá que “nos tiempos caberos la llingua asturiana vien sofriendo importantes y numberosos ataques no que cinca al so enseñu y a la so presencia nel sistema educativu: dende’l so arrequexamientu, col estatus de “minor”, nos planes d’estudiu de la Facultá de Filoloxía al intentu de facela esapaecer de les enseñances reglaes de la Escuela de Maxisteriu pasando pola situación d’illegalidá, según afita’l Tribunal Supremu, de les plantíes funcionales de docentes, que dexa al debalu a los mayestros y mayestres d’asturianu. Ataques colos que s’intenta dexar ensin posibilidá de formación a los futuros mayestros d’asturianu y que recorten los drechos de los que yá lo son”.

Poro, Andecha Astur sofita públicamente la manifestación que la Xunta pola Defensa de la Llingua Asturiana (XDLLA) convoca, baxo’l lema “En Maxisteriu y nel sistema educativu, la llingua asturiana ¡como les demás!”, pal prósimu sábadu, 7 de marzu, n’Uviéu y fai un llamáu a los sos militantes y simpatizantes pa qu’acudan a una movilización na qu’esta organización política reivindicará, “la oficialidá pal asturianu como midida irrenunciable pa finar con estos ataques a la nuesa llingua y normalizar dafechu la so presencia nel sistema educativu”.

Andecha Astur quixo aprovechar el comunicáu pa denunciar, la que consideren “postura pasiva y claudicante de les estayes d’enseñu de los sindicatos españoles UXT y CCOO, no que cinca a la situación de los mayestros y mayestres d’asturianu, y de los partíos políticos Izquierda Unida y Bloque por Asturies (casualmente toos ellos miembros d’una plataforma pro-drechos llingüísticos como ye’l Conceyu Abiertu pola Oficialidá), que pautaron un alcuerdu de gobiernu col PSOE renunciando dafechu a la oficialidá de la llingua asturiana” a cambiu, a xuiciu d’AA, “d’algamar puestinos bien remuneraos nel organigrama del Gobiernu’l ‘Principáu’”.

Tamién te podria gustar