Andecha Astur denuncia l’apaición de 20.000 pieces arqueolóxiques n’estáu d’abandonu

24 abril 10:26 2010 Imprimir

La noticia de l’apaición de 20.000 pieces arqueolóxiques procedentes de les escavaciones de La Campa Torres n’estáu d’abandonu, y ensin inventariar, nuna habitación clausurada nel llugar ye p’AA “otru motivu de disgustu y quexa pa los asturianos”.

La formación nacionalista esplica que mos atopamos énte “un casu de dexadez del ‘Principado’ y, nesti casu, del Conceyu de Xixón, nun tema referente al padrimoniu históricu asturianu; y de quexa porque l’actitú de los responsables direutos d’esta situación –arqueólogos encargaos de los trabayos en La Campa Torres, políticos municipales y persones al frente de Cultura– ye vergoñosa al pasase la pelota unos a otros”.

Andecha Astur llamenta un casu nuevu “de perda de padrimoniu n’Asturies” y recuerda qu’estes pieces, “claves pa conocer el pasáu de los asturianos y de los primeros habitantes del Conceyu de Xixón, van resultar inservibles p’afondar na evolución del pobláu nos sos ochos sieglos de vida y amenorguen la importancia del so descubrimientu hai agora una década”.

Igualmente, Andecha Astur esixe que dende la Conceyalía de Cultura s’abra una investigación pa conocer quién foi’l responsable direutu del abandonu d’este pieces y que se depuren responsabilidaes.

  Categories:
Loading Facebook Comments ...