Andecha Astur de Corvera denuncia nos xulgaos l’incendiu d’una panera na zona del SAPU I

L’agrupación local d’Andecha Astur de Corvera presentó esta selmana énte los xulgaos de guardia d’Avilés una denuncia pol incendiu, presuntamente provocáu, d’una panera nel llugar de Los Campos. Los nacionalistes afirmen que tomen esta iniciativa “al non alcontrar nengún movimientu alministrativu pola parte del Ayuntamientu Corvera pa que s’investigara lo asoleyau”, una actitú que califiquen de “parsimonia como prautica habitual nel equipu de gobiernu cuando se fala d’asuntos culturales”. L’agrupación corverana d’A.A. relaciona esti incendiu, supuestamente provocáu, colos planes urbanísticos pa la zona.

Los autores de la denuncia caltienen nun comunicáu que “esisten pruebes pa que detrás d’esti atentau cultural haya un escuru trámau urbanísticu” y recuerden lo sucedío a finales de 2003, cuando se produxo na mesma panera, agora quemada, l’espoliu d’una de les sos puertes con decoraciones d’altu valir etnográficu y la demolición al llau d’una casona mariñana`, too ello nel entornu de les obres d’una constructora. Entós los fechos denunciáronse nel Ayuntamientu pa que’l conceyu espurriere la correspondiente sanción administrativa a la constructora, ensin ésitu. Empobinada la denuncia a la Conseyería de Cultura, esti organismu sí pidió al Ayuntamientu la suspensión cautelar de les obres, una resolución, qu’a xuiciu d’Andecha, sigue vixente.

Dende va tiempu colectivos ciudadanos como la Plataforma Cultural de Corvera vienen alertando del peligru que suponen los planes úrbanisticos desenvueltos al través de la zona SAPU I de SOGEPSA pa la conservación del patrimoniu etnográficu y hestóricu de la zona rural del conceyu. Esa plataforma considera de magar especialmente preocupante la situación del núcleu rural de Truyés, onde amás de construcciones y elementos de fondu valir etnográficu, atópase un afayamientu arqueolóxicu.