Andecha Astur convoca pal sábadu 30 d’agostu a un actu d’homenaxe a la Declaración de Soberanía

25 agostu 10:47 2014 Imprimir

Andecha Astur convoca pal sábadu 30 d’agostu al actu d’homenaxe a la Declaración de Soberanía cola que’l Conseyu Soberanu declaraba la independencia de la República española. El sábadu 30 d’agostu, nel Puertu Tarna, a la 1 del meudía tendrá llugar el tradicional actu de comemoración y homenaxe a la Declaración de Soberanía del Conseyu Soberanu por mor de la qué se declaró independiente de la República Española y col qu’entamó un auténticu procesu revolucionariu y de reconocencia a nivel internacional que defendió heróicamente coles armes frente a un exércitu franquista y los sos alliaos alemanes.

Nuna nota de prensa asoleyada esti día, Andecha Astur amuesa que “güei, cuandu l’Estáu español continúa col procesu d’asimilacionismu y negación de la identidá nacional asturiana y de los nuesos drechos colleutivos, y cuandu la izquierda española n’Asturies pretende garrar fuercia con proyeutos estatalistes importaos dende Madrid y nos qu’Asturies nun ye más qu’una sucursal ensin reconocencia de la so identidá nacional y soberanía”, la organización nacionalista asturiana quier facer “un llamamientu al conxuntu de la sociedá asturiana a recuperar aquellos valores que llevaron al Pueblu Asturianu a asumir les riendes del so propiu destín y a lliberase de proyeutos españolistes que torguen la mesma sobrovivencia d’Asturies comu nación”.

  Categories:
Loading Facebook Comments ...