Portada Política Andecha Astur consigue homologar les papeletes n’asturianu pal Congresu y el Senáu

Andecha Astur consigue homologar les papeletes n’asturianu pal Congresu y el Senáu

by asturnet

Andecha Astur va emitir esta tarde un comunicáu ampliando la información, pero’l diariu dixital Asturnews pudo conocer yá en primicia les reacciones del representante d’esta formación énte la Xunta Electoral, Toño Martínez, a la decisión d’esta institución d’homologar les papeletes presentaes pola formación nacionalista d’esquierdes en llingua asturiana. Esta decisión supón, que per primer vegada na hestoria, va ser posible votar cola papeleta redactada n’asturianu.

Andecha Astur lleva años reclamando esti drechu y “yá nel añu 1995 nun nos presentemos por negásenos el drechu a presentamos n’asturianu” recuerda Martínez. Más tarde, en 1999, la formación algamó nel Tribunal Constitucional que se reconociera la posibilidá d’esti usu. Sicasí, va cuatro años tovía se declaron nulos dellos votos n’Asturies por tar n’asturianu, énte lo qu’Andecha Astur intentó “que constase n’acta que la razón fuere tar redactaes n’asturianu, cola negativa consiguiente”.

Les primeres impresiones de Toño Martínez dempués de recoyer les papeletes yá homologaes y la notificación del alcuerdu de la Xunta Electoral foi felicitase de que “Por fin va poder votase n’asturianu”. La notificiación de la Xunta Electoral recueye que “les papeletes asoleyaes por Andecha Astur pal Congresu y pal Senáu n’asturianu tán homologaes pa la so distribución”.

Amás, recuerden dende Andecha Astur, “Les papeletes presentaes por Andecha Astur son dafechu válides pa emitir el votu”, anque les del Senáu “nun van poder ofrecese nos colexos electorales”, al tar los candidatos d’Andecha Astur yá marcaos cola cruz.

Sicasí, les papeletes asoleyaes pola alministración siguen tando en castellán. Una cuestión que nel futuru podría camudar dempués d’esta decicisón de la Xunta Electoral. Un futuru que los representantes d’Andecha comenten “la verdá que nun sabemos tovía les repercusiones que pue tener nun futuru”.

Les elecciones del 9 de marzu de 2008 serán recordaes como les primeres nes que se puea votar n’asturianu.

Tamién te podria gustar