Portada Política Andecha Astur celebra’l ñacimientu de la República Democrática de Kósovu

Andecha Astur celebra’l ñacimientu de la República Democrática de Kósovu

by asturnet

Nun comunicáu, la organización política Andecha Astur quixo espresar ayeri públicamente “el so preste pol ñacimientu, el pasáu domingu 17 de febreru, de la República Democrática de Kósovu, tres proclamar la so independencia’l Parllamentu del país balcánicu exerciendo con ello el drechu d’autodetermín qu’a tou pueblu-y asiste, reconocíu internacionalmente”. La organización súmase asina a los apoyos daos por otros partíos nacionalistes del estáu, como ERC, CiU o’l PNV.

Andecha Astur, sigue’l comunicáu, “ve nel ñacimientu d’esti nuevu estáu la confirmación d’un procesu imparable dientro del continente européu”, un procesu qu’entamó pa la organización na década de los noventa del pasáu sieglu, “tres la desintegración de la XURSS, y que ta marcando una dómina na que les naciones ensin estáu reclamen y algamen la so soberanía ensin suponer dengún tipu de problema pa la estabilidá internacional”.

La organización Andecha Astur anunció nel comunicáu que va unviar un comunicáu de felicitación y sofitu al Parlamentu kosovar y xulgó “ridícula” la situación que se vive nel Estáu español, “que, por ciertu, nun reconoció’l nuevu estatus llegal de Kosovo, y l’actitú de los sos dirixentes, que siguen empeñaos en ñegar el mesmu drechu, el d’autodetermín, a les naciones qu’obligadamente lu formen”.

Tamién te podria gustar