Andalucía y Asturies son les comunidaes que más consumen

23 avientu 04:52 2008 Imprimir

Un estudiu de FUNCAS (la Fundación de les Caxes d’Aforros) pinta’l mapa de España abondo estremáu a cómo lu conocemos y asitia a Andalucía y Asturies como les comunidaes más “gastices”. Los redactores del informe tuvieron en cuenta l’aportación al PIB, la propensión al gastu y el nivel económicu pa dibuxar un perfil económicu de les distintes rexones.

Les provincies colos precios hasta un 15% más baxos que la media nacional (Badaxoz y Cádiz) son tamién les que rexistren niveles de paru y desocupación más elevaos. Y por embargu, la provincia que rexistra menos desemplegu ye Lleida. Un raquíticu 3% nel momento de ellaborase l’estudiu.

Poro, FUNCAS insiste en que los datos sobre’l coste de la vida nun se corresponden necesariamente colos de la renta familiar real, pol impautu que tien la marxinación social en cada rexón. Asina, les zones con más diferencies sociales puen acabar paeciendo más probes de lo que son realmente.

L’estudiu revela que la comunidá española con mayor renta bruta por habitante ye la del País Vasco (126,56);Murcia ye la que tien oficialmente la renta familiar más baxa, con un 83,01. Pero hai datos pa tolos gustos. Asina, Aragón ye la que más xorrez, Baleares, Valencia y País Vascu les que menos gasten o más aforran, cásique’l 35% del so PIB. Les que más consumen, Andalucía y Asturies, y la que menos aforra, Estremadura.

  Categories:
Loading Facebook Comments ...