Portada Cine Ana Pérez Valdés abre’l tercer ciclu de videoarte de La Factoría

Ana Pérez Valdés abre’l tercer ciclu de videoarte de La Factoría

by redacción asturnews

La Factoría Cultural empecipió’l vienres 9 el so tercer ciclu de videoarte y cola pantalla allugada na fachada del equipamientu de l’Avenida de Portugal va dexar contemplar, hasta’l 3 de setiembre, les creaciones audiovisuales de cinco autores. La primera d’elles ye la obra Hydra, d’Ana Pérez Valdés, que yá se puede visionar diariamente de 19 a 22 hores, hasta’l 5 de mayu.

La conceyala de Cultura, Yolanda Alonso, participó esti vienres na inauguración d’esti tercer ciclu de videoarte, que xunto cola yá mentada pieza d’Ana Pérez Valdés va llevar hasta La Ventana de la Factoría obres de Daisy Collingride, Lara + Coto, Verónica Ruth Fríes y Ricardo Villoria.

El filu conductor d’esti tercer ciclu de La Ventana de la Factoría ye la relación ente cultura y naturaleza, convidando a la reflexón sobro la construcción humana d’estos conceutos como opuestos, sobro los qu’estos artistes investiguen al traviés de les sos pieces audiovisuales.

Hydra, d’Ana Pérez Valdés, parte d’un escenariu bien concretu: el balneariu Agües del Lérez, construyíu pol ser humanu metanes una redolada natural, dedicáu a la salú y el cuidu del cuerpu. Xuna cuestión popular a principios del XX y totalmente contemporanea, na cual los conceutos nietzscheanos de lo apolíneo y lo dionisíaco preséntense como fuerces engarraes.

Na obra confrontense l’orde y el control frente a lo que s’enche y escarez de fronteres, como la naturaleza; nesti casu un cuerpu exercitáu contra un cuerpu híbridu que flúi y camuda. Hydra plantega un acercamientu sensorial a estos conceutos, xuna especie de fábula onde se garrasti al tresformamientu d’estos cuerpos y de la so imaxe.

Diseñadora ya investigadora, Ana Pérez Valdés ye natural de Tinéu y afincada en Pontevedra y el so trabayu reflexa un alcuentru y fusión ente diverses disciplines. Titulada en Diseñu de Moda (ESDEMGA, Universidá de Vigo) y en Belles Artes, con máster n’Arte Contemporaneo (Universidá de Vigo), participó en diverses pasareles de moda, esposiciones d’arte colectivu y festivales de cine y videocreación. Ana Pérez Valdés participó nos certames ACTITÚ (Nijmegen, Países Baxos) Join the Reunion (Tilburg, Países Baxos) Tecidos y vistíos non llaboratoriu gráficu (Vigo, España y Medellín, Colombia) Espaço Residual (Monçao, Portugal) y los festivales Traverse Vidéo (Toulouse, Francia) y Novos Cinemas (Pontevedra). Anguaño ye doctoranda nel programa de Creación ya Investigación n’Arte Contemporaneo ya investigadora contratada pola Universidá de Vigo.

Programación del 3er ciclu de videoarte de La Ventana de la Factoría

Abril – setiembre 2021

9 abril – 5 mayu: Hydra, d’Ana Pérez Valdés (Tinéu)
6 mayu – 3 xunu: Lippi, de Daisy Collingride (Londres)
4 xunu – 1 xunetu: Un bon empiezu, de Lara + Coto (Beatriz Coto, de Xixón, y Santi Lara, de Tomelloso)
2 xunetu – 2 agostu: A 153 cm sobro la tierra, de Verónica Ruth Fríes (Córdoba)
3 agostu – 3 setiembre: Coca-Cola / Tomate / Huevo / Farina / Espluma, de Ricardo Villoria (Llaviana).

Tamién te podria gustar