Ana Cano volvió a pidir la oficialidá na Xunta Estraordinaria de l’ALLA nel Teatru Campoamor

Una bayurosa representación de la sociedá asturiana tuvo presente ayeri nel Teatru Campoamor pa celebrar xunto cola Academia de la Llingua Asturiana’l XXIX Día de les Lletres Asturianes. L’actu abriólu’l gaiteru Llorián García, que consiguió una importante ovación. Darréu abrióse’l telón y los miembros de l’Academia entamaron la Xunta Estraordinaria nomando a Berta Piñán miembru de númberu.

La escritora Berta Piñán fizo un discursu nel que recordó como “la fuercia de la poesía” y non “una güela cuntándome vieyes hestories al pie del llar”, foi lo que la traxo al mundiu de la creación en llingua asturiana, del que l’autora diz “yá nunca torné igual”.

La Presidenta de l’Academia de la Llingua Asturiana, Ana Cano, tomó’l relevu y fizo’l so discursu institucional, nel que destacó la figura de la poeta recién nomada académica de númberu, comentó los resultaos electorales na Universidá, la presencia de programación n’asturianu na TPA, de la que destacó la importante audiencia y la necesidá de facer medrar la cantidá d’hores emitíes. Darréu fizo un repás al trabayu fechu pola Academia nel añu últimu pa pidir dempués la oficialidá nuna llarga esposición na qu’argumentó les distintes razones que conformen la necesidá del estatus d’oficialidá pa la llingua asturiana.

L’actu continuó, cola presentación de Próspero Morán, director d’Asturnews, que lleó dellos poemes del númberu 98 de Lletres Asturianes.

En terminando Morán, entamó l’Homenaxe a la Música Asturiana, nel que participaron con dos temes caún Nuberu, Llan de Cubel, Los Berrones, Carlos Rubiera y Dixebra. Especialmente prestosu foi’l momentu nel que Chus Pedro y Marcos Llope, de Llan de Cubel interpretaron xuntos un tema al que se sumó de manera espontanea Carlos Rubiera. Xune Elipe remató esta estaya del actu con Rapaza Nacionaliega y Mañana fría, que dedicó a Berto Turulla, Ígor y Carlos, de Felpeyu y a “tolos músicos que quedaron nel camín nestos trenta años”.

Llorián García volvió a salir pa interpretar l’Himnu d’Asturies a la gaita, momentu nel que’l Teatru Campoamor se punxo en pie y que sirvió de pieslle pa esti XXIX Día de les Lletres Asturianes.

Discursu completu de la Presidenta de l’Academia de la Llingua Asturiana, Ana Cano