Portada Sociedá Ana Cano ve’l procesu de recuperación irreversible

Ana Cano ve’l procesu de recuperación irreversible

by redacción asturnews

“El Academia entende a Asturias non como úa mera entidá alministrativa, sinón como un País que configura úa realidá histórica integral”. Esti sentir espresáu n’eonaviegu y la oficialidá del asturianu vista como un problema d’Asturies, pero tamién “una cuestión d’Estáu” rellumaron nel discursu institucional del Día de les Lletres que pronució Ana Cano nel Teatru Campoamor.

“El Academia entende a Asturias non como úa mera entidá alministrativa, sinón como un País que configura úa realidá histórica integral. Esta consideración é importante porque lleva ben axina a que os graves problemas cos que cargamos todos os asturianos y asturianas (económicos, sociales y culturales) teñan que ser encaraos dende úa perspeutiva política, de política asturiana, y non dende plantiamentos esclusivamente «téunicos» o «alministrativos»”. Estes yeren les palabres n’eonaviegu coles qu’entamaba la presidenta de l’Academia de la Llingua Asturiana, Ana Cano, ún de los más aposentaos y equilibraos discursos que se remembren nel Día de les Lletres qu’esti mayu cumplía 37 ediciones.

Un discursu nel que quiso homenaxear a la fastera más occidental d’Asturies coles sos palabres, como depués se fizo nel mesmu actu cola música rock de Bacotexo, nun actu que s’allargó como siempres pero que tuvo un equilibriu y un ritmu aposentáu que lu ficieron brillar como dengún añu. Y un discursu nel que nun podía faltar la rellación de los fechos asocíos nel añu que, como dixo Ana Cano, nesta ocasión “podríen llevar a dalgunos a camentar que l’Academia ye pesimista con respeutu al futuru de la Llingua”. Pero la presidenta quixo dexar perafitao dende l’entamu que “nun ye verdá, nós consideramos que’l procesu de recuperación llingüística ye irreversible porque hai llogros que yá nun almitiríen, socialmente, una marcha atrás”.

La negociación coles fuercies polítiques foi parte del discursu, con especial referencia a la esquizofrenia del PP y de la so presidenta Mercedes Fernández porque “ye que cada vegada qu’hai la posibilidá de dar un pasu alantre na dignificación del asturianu apaez la intransixencia más xabaz pa desanicialu”.

La presidenta de l’Academia tampoco nun quixo dexar de llau otru episodiu llamentable, el del Plan de Normalización de Carreño:  “l’Estáu, al traviés de la so Delegación del Gobiernu n’Asturies vien d’anular, va unos díes, el «Plan de Normalización Llingüística del Conceyu de Carreño, un plan modestu qu’intentaba namái, acordies col curtiu marcu llegal asturianu, sofitar l’usu voluntariu de la llingua asturiana per parte los vecinos del Conceyu. L’argumentu, dafechu espantible, ye que los asturianos tenemos prohibío emplegar la llingua propia nes rellaciones coles entidaes llocales”.

Pero Ana Cano enfrentose a la tema siempres dende una perspectiva positiva: “Nós treslladámos-yos la idea de que, como tamos viendo, el marcu llegal actual nun garantiza la sobrevivencia del idioma, de que ye necesaria una co-oficialidá axustada a la realidá concreta d’Asturies y de qu’esta figura xurídica habría amestase, xunto con otres meyores que se consideraren, nel Estatutu d’Autonomía d’Asturies. Los nuesos interllocutores nun retrucaron estos plantegamientos. Nidiamente nun hai argumentos a la escontra (nin sociales, nin culturales, nin políticos… nin económicos)”. Y por eso Ana Cano amosose paciente: “Aguardamos agora, col mayor interés, conocer cuál va ser el so posicionamientu y la so estratexa pa llevalu alantre”.

Pa finar Ana Cano quixere lleer un poema, xustamente d’ún de los nuevos académicos, de Pablo Suárez García, “poema qu’espeya perbién lo qu’a dalgunos-yos prestaría que pasare col idioma d’Asturies, pero que dende llueu nun va pasar…. Teníemos un Palaciu…”. Una perguapa alegoría de la llingua asturiana que-y sirvió pa dexar bien afitao que “Teníemos un palaciu….Tenemos un palaciu…..Y siguiremos teniendo un palaciu….” la llingua asturiana.

Nel actu institucional del Día de les Lletres d’esti añu la presencia d’autoridaes polítiques sociales, universitaries y culturales foi bayurosa, entamando polos que ya veníen de participar na manifestación como Gaspar Llamazares, Manolo Orviz o Roberto Sánchez Ramos d’izquierda Xunida (que davezu participen nos actos) o los diputaos de Podemos Emilio León, Daniel Ripa, Andrés Ron o Héctor Piernavieja, la so diputada nel Congresu Sofía Castañón o la parlamentaria europea Tania González, la vicealcaldesa Ana Taboada y dellos otros conceyales.

Nel PSOE, nun faltó l’acalde uvieín, Wenceslao López, y tamién asistieron representantes de dellos otros partíos como Foro Asturies, con Isidro Martínez Oblanca que tamién asiste davezu a la celebración.

La novedá d’esti añu foi la presencia per primera vegada de un Rector de la Universidá d’Uviéu, Santiago García Granda, qu’entá como rector electu, a la espera de la so toma de posesión, fizo compaña a la Directora Xeneral d’Universidaes, l’académica Cristina Valdés, y al Conseyeru d’Educación Genaro Alonso.

Tamién te podria gustar