Ana Cano refuga la fórmula de decretu autonómicu pala especialidá docente

Ana Cano refuga la fórmula de decretu autonómicu pala especialidá docente
14 xineru 15:38 2016 Imprimir

La presidenta de l’Academia de la Llingua Asturiana, Ana Cano, amosó otra vuelta la postura de la institución que refuga crear la especialidá docente d’asturianu con un decretu autonómicu y esixó que seya por un cambiu del decretu estatal d’especialidaes.

Les declaraciones ficiérales esti día a los medios de comunicación en calteniendo una xunta col voceru de Ciudadanos na Xunta Xeneral, Nicanor García, dientro de los contautos que la institución vien calteniendo colos partíos políticos n’Asturies alrodiu de la situación de la llingua asturiana.

L’anunciu del conseyeru d’Ecuación, Genaro Alonso, del entamu de les xestiones pa crear con un decretu autonómicu la especialidá de llingua asturiana como vienen pidiendo tolos sectores implicaos dende va años ye pala presidenta de l’Academia un apañu como tolo que se fai alrodiu de la llingua: “El decretu d’especialidaes nun ye competencia del Gobiernu del Principáu, ye del de Madrid, y pidimos ye qu’esi decretu se modifique y se contemple tamién la especialidá de llingua asturiana”, señaló Cano.

La presidenta de l’Academia fizo alcordanza tamién de que la Llei Wert reconoz la existencia de llingües non oficiales, y poro entiende que se recueye la posibilidá d’incluyiles nesi decretu d’especialidaes, a lo que paez renunciar el Principáu al plantegar una vía que nun esiste en denguna otra comunidá autónoma y que nun ye la vía normal.

Loading Facebook Comments ...