Ana Cano: “El futuru d’Asturies como pueblu nun ye dable ensin un futuru pal asturianu”

06 mayu 23:04 2012 Imprimir

Asturies celebraba esti vienres pasáu’l Día de les Lletres Asturianes. Dempués de la manifestación pola oficialidá celebrada peles cais d’Uviéu, l’Academia de la Llingua Asturiana tenía prepara la so Xunta Estraordinaria añal, un actu solemne qu’esti añu, y por mor de la crisis, tuvo un aspectu menos engalanáu pol cambiu d’escenariu, del Campoamor al Filarmónica y formatu, del tradicional nomamientu d’académicos a les intervenciones de persones reconocíes de dellos sectores sociales. La xunta entamó con una añada al curdión de Xuan Nel Expósito y una tonada de Marisa Valle Roso, y siguió cola apaición de los trés máximos responsables de l’Academia, en llugar de la tradicional mesa con dellos miembros de la institución. Amás esti añu, Ana Cano, nun llució’l traxe’l país, como vien faciendo nes ocasiones últimes. Les intervenciones vinieron enantes del so discursu y nes voces de la periodista Pilar Rubiera, l’escritor Luis Arias, la vicerrectora Paz Rendueles, el director del Festival Intercélticu de Lorient Lisardo Lombardía, el músicu Ricardo Saavedra ye el matemáticu Pedro Suárez.

Toos ellos ficieron un repás, caún nel so ámbitu, a la presencia del asturianu y al futuru del idioma, nunos discursos enllenos de carga sentimental y rabia pola situación del asturianu, que pudo sentir un públicu que cuasi enllenaba’l teatru y ente’l que taba una de les representaciones polítiques más amplies de los años últimos, sobre manera de la formación Foru, anguaño nel Gobiernu d’Aturies. Hasta trés diputaos d’Izquierda Xunida, incluyendo a Jesús Iglesias, el senador de Foru, Isidro Martínez Oblanca, el conceyal de cultura de Xixón, del mesmu partíu, Carlos Rubiera, el conceyal en Noreña por Foru, Inaciu Iglesias, la secretaria xeneral d’esti partíu, la Conseyera d’Educación, y otros represantantes de distintes formaciones, sindicatos, asociaciones y movimientos sociales.

El discursu de la Presidenta de l’ALLA nel XXXIII Día de les Lletres Asturianes foi unu de los más curtios de los años caberos, centrándose más na llaceriosa situación del idioma asturianu y na falta de recursos que carez la institución. Y ye que Cano abría les sos pallabres afirmando que la celebración se facía “nuna situación d’esceicionalidᔠpola “crisis económica ensin precedentes na historia recién y, a nivel d’Asturies, por una crisis d’estabilidá política con perfondes implicaciones socio-económiques y culturales”.

Coles intervenciones previes, esplicó Ana Cano, “venimos de dar voz a distintos asturianos y asturianes, persones dueites toes elles, carauterizaes pol so compromisu con Asturies y pol so amor a esta tierra”.

Una de les peticiones de l’ALLA foi la fin de los retayos a la so institución, que recordó “baxa un 40% nel so presupuestu”, lo que dixo “nun paez razonable y lleva apareyao, amás, que la institución nun puea llevar alantre los sos cometíos fundacionales, venceyaos, ensin dulda, a la meyora de la vida social y cultural asturiana”. Por ello pidió “a los nuevos dirixentes políticos del Principáu que se rectifique una decisión presupuestaria dafechu inaceptable”, recordando les aportaciones estatales recibíes por otres academies de llingües, que l’ALLA nun recibe.

Cano reconoció qu’en dómines de crisis “la política cultural faise enforma más difícil dende’l puntu de vista de la so tresllación social, pero nun mos engañemos, nun hai crisis que xustifique la renuncia a los derechos culturales y llingüísticos, como nun hai crisis que xustifique la perda de los derechos humanos más elementales”, afirmó recordando que’l drechu al usu de la propia llingua “ye un drechu reconocíu pola Organización de les Naciones Xuníes como derechu humanu fonderu, lo mesmo que pola Declaración Internacional de los Drechos Llingüísticos”.

“Lo que nun se fixo nes époques de bonanza, porque nun supimos o nun quiximos (o nun quixeron), hai que facelo agora en materia de política llingüística, porque nun se pue aguardar muncho más: necesitamos racionalidá, planificación y xusticia”, esplicó Cano, que darréu reclamaba “racionalidá”, poniendo como exemplos la reconocencia de la especialidá de llingua asturiana pal profesoráu d’Educación Primaria y Secundaria, el diseñu d’un verdaderu procesu de recuperación llingüística n’Asturies y la reconocencia de la oficialidá de la llingua asturiana, ufriéndose a collaborar “nel llogru d’una sociedá asturiana abierta, non escluyente y dinámica culturalmente, lloñe de complexos y rocees pasaes”, porque p’Ana cano “tamos refiriéndonos al futuru d’Asturies como pueblu, futuru que nun ye dable sin un futuru pa la llingua asturiana”.

Los presentadores del actu, Sonia Avellaneda y Próspero Morán, pesllaron la Xunta Estraordinaria cola llectura de poemes de Lletres Lliterariu 4, asoleyado por mor d’esta xornada, poniendo fin al mesmu la Banda de Gaites de Villaviciosa, qu’incluyó ente los sos temes una versión de Dixebra como homenaxe a los sos venticinco años como banda.

Semeyes del actu nel Filarmónica d’Uviéu

  Categories:
Loading Facebook Comments ...