Portada Sociedá Ana Cano: “La llingua propia ye una cuestión tresversal qu’ha formar parte del ideariu democráticu de tolos partíos”

Ana Cano: “La llingua propia ye una cuestión tresversal qu’ha formar parte del ideariu democráticu de tolos partíos”

by asturnet

El Teatru Campoamor volvió acoyer esti vienres, Día de les Lletres Asturianes, la Xunta Estraordinaria de l’Academia de la Llingua Asturiana, dempués d’una manifestación peles cais d’Uviéu onde miles de persones reclamaron la oficialidá del asturianu. Nel actu académicu, qu’enllenó’l teatru uvieín, tuvo llugar el nomamientu del nuevu académicu d’honor, José Ramón Morala Rodríguez, caderalgu de la Universidá de Lleón y especialista nel estudiu hestóricu del dominiu llingüísticu ástur al sur del Cordal. Amás reconocióse’l llabor a favor del asturianu del ex ciclista Chechu Rubiera.

L’actu abriéronlu’l cantante de tonada José Manuel Collado y el gaiteru Oscar Fernández González, presentando darréu la gala los periodistes Sonia Avellaneda y Próspero Morán.

La llectura del acta de la Xunta tuvo a cargu de Roberto González-Quevedo, Secretariu de l’ALLA, entregándose darréu los reconocimientos al nuevu académicu y a Rubiera, qu’abrieron les interevenciones.

José Ramón Morala Rodríguez recordó los sos entamos académicos n’Uviéu, onde reconoció ñació’l so interés poles variantes llingüístiques. El nuevu miembru d’honor de l’ALLA comprometióse a siguir sofitando’l llabor de l’ALLA “como lo fici dende’l primer momentu, yá que la mio primer intervención nun congresu foi nes Xornaes d’Estudiu d’esta institución”, añadió.

El discursu del ex ciclista Chechu Rubiera tuvo un aire bien estremáu. Nél, recordó la so rellación col asturianu dende bien pequeñu y como lo prexuicios pa cola llingua lu marcaron dende bien pequeñu. Rubiera defendió l’asturianu como “una llingua d’alcuentru y non de desalcuentru” y amosóse arguyosu de ser asturfalante, agradeciendo a l’Academia la reconocencia fecha.

Darréu llegó la intervención de la Presidenta de l’ALLA, Ana Cano, que como cada añu fizo repás de les actividaes entamaes pola institución dende’l Día de les Lletres posteru.

Ana Cano tuvo un recuerdu pal escritor Nel Amaro, fináu apocayá, del que destacó ser “ún de los primeros autores del Surdimientu”, tando amás “alloñáu yá de fórmules costumistes y diglósiques” na so primer obra de 1978. Cano afirmó que Amaro “,siempres tuvo averáu a l’Academia”, polo que pa la institución, “ye una perda inda más doliosa y emotiva”.

Darréu del repás biográficu del nuevu académicu y de Chechu Rubiera, Cano faló de les novedaes anuncies apocayá pa la revista Lletres Asturianes, amás de dar anuncia de la publicación nel BOPA del alcuerdu ente l’ALLA y la Universidá d’Uviéu qu’afita la Universidá Asturiana de Branu (UABRA) pal futuru y la inclusión d’ocho cursos nuevos alredor de la hestoria, la cultura, la toponimia, internet… Amás dio anuncia de les novedaes bibliográfiques de l’Academia.

En cuantes al analís de la situación sociopolítica, Ana Cano definió’l momentu como “un encruz perimportante pal futuru la llingua”, recordando que “l’ALLA, como institución oficial del Principáu d’Asturies, proclama otra vegada más la so neutralidá política y hasta, si me dexen dicilo, la so independencia con respeutu al poder políticu, seya esti poder del signu que seya”.

L’Academia , sicasí, “faciendo usu del papel tutelar de los derechos llingüísticos de los asturianos que-y atribúin los sos estatutos fundacionales” treslladó yá a toles opciones polítiques “la necesidá d’un tratamientu axeitáu de la política llingüística nel futuru inmediatu d’Asturies”. La institución entiende que “la defensa del derechu al usu de la llingua propia ye una cuestión tresversal qu’ha formar parte del ideariu democráticu de tolos partíos, de cualesquier tendencia, que trabayen por y per Asturies”.

Ana Cano recordó que “llueu de 35 años d’entamáu’l procesu de recuperación y, magar lo que s’apregonaba (y llamentablemente se sigue apregonando dacuando), el marcu xurídicu qu’agora tenemos de proteición de la llingua nun ye abondo pa vivir llibre y cotidianamente n’asturianu”. Por ello, reclamó, una vegada más, un estatus pal asturianu asemeyáu “al que llograron abenayá los ciudadanos baleares, valencianos, catalanes, araneses, navarros, vascos y gallegos”.

L’Academia de la Llingua Asturiana, recordó Cano “ta preparada pa la interllocución col próximu Gobiernu d’Asturies” y recordó al Gobiernu d’Asturies que van actuar “con llealtá y buscando la fórmula constitucional más afayadiza pa que l’exerciciu de los nuesos derechos llingüísticos nun se dixebre de la solución constitucional escoyida poles otres comunidaes billingües del Estáu”.

La presidenta de l’ALLA compromtióse a “ayudar na busca d’una fórmula xurídica d’oficialización del asturianu, asumible por tolos partíos que s’asitien na Xunta Xeneral, que garantice derechos civiles y nun imponga obligaciones a los que nun quieran exercelos, pero que sí los garantice —repito— a los que también mos pruya exercelos en llibertá; oficialización qu’ha ser asinamesmo razonable dende’l puntu de vista económicu y planificada y gradual na so puesta en práutica”. Una solución, dixo la cabezalera académica, “pa iguar, de mou definitivu, el marcu de sobrevivencia del idioma milenariu d’Asturies o, lo que ye lo mesmo, de la propia Asturies”.

L’actu siguió cola llectura de poemes del númberu 3 de Lletres Lliterariu per parte de Próspero Morán y Sonia Avellaneda, col conciertu del grupu Xera, y con un incidente nel descansu ente estes dos actividaes. Un grupu d’activistes llevántaronse frente al palcu del Delegáu del Gobiernu d’Asturies, Antonio Trevín, con pancartes reclamando “democracia y oficialidá”. Yá a les puertes del Campoamor, un militantes nacionalista foi multáu pola policia dempués de que’l Delegáu del Gobiernu lu denunciara por llamalu “corruptu” al so pasu.

Amás de Trevín, tuvieron nos palcos del Campoamor, otres representantes del PSOE, IX, URAS-PAS, Bloque por Asturies-UNA y Foru Asturies. Asistieron tamién la presidenta de la Xunta Xeneral, María Jesús Álvarez; la Conseyera de Bientar Social y Vivienda, Noemí Martín; la diputada d’IX Emilia Vázquez y el vicerrector de la Universidá d’Uviéu, Santiago García, amás de dellos decanos y profesores de la institución, xunto a representantes sindicales.

Col Campoamor enteru de pies, sintióse a la fin del actu l’Himnu d’Asturies, entonáu polos asistentes y tocáu a la gaita por Oscar Fernández.

Semeyes del actu nel Campoamor d’Uviéu

Tamién te podria gustar