Portada Lliteratura Ámbitu saluda la Selmana de les Lletres con dos obres de Bello y D’Andrés

Ámbitu saluda la Selmana de les Lletres con dos obres de Bello y D’Andrés

by asturnet

Dos novedaes editoriales pa saludar la inminente XXV Selmana de les Lletres Asturianes, qu’empieza el prósimu llunes. La casa Ámbitu acaba asoleyar la versión n’asturianu de ‘Historia universal de Paniceiros’, de Xuan Bello, y la obra de Ramón D’Andrés ‘Primeres Llecciones n’Asturianu’, un métodu didácticu pa facilitar el deprendizaxe de la llingua asturiana.

No que cinca a la narración de Bello, qu’algamó ampliu ecu de difusión y crítica na so versión en castellán -incluyíu’l Premiu ‘Ramón Gómez de la Serna’ del Ayuntamientu de Madrid-, los responsables de la edición de ‘Hestoria universal de Paniceiros’ destaquen la capacidá l’autor fa pacer partícipe al llector del so rellatu, dientro d’una crónica emocional d’un mundu camín del desapaecimientu.

El segundu de los títulos qu’agora asoleya Ámbitu céntrase nel puru didactismu y ufre-y al públicu un nuevu métodu pa deprender llingua asturiana a un nivel básicu. Ensin arrenunciar a entretener al llector con datos curiosos y con claridá pedagóxica, el profesor Ramón D’Andrés -qu’amás ye director de la Oficina de Política Llingüística’l Principáu- firma un total de 112 páxines empobinaes a los que s’averes por primer vegada al idioma asturianu.

La editora Ámbitu, que ye responsable de la publicación del selmanariu Les Noticies, afita un preciu de 12 euros pa caún de los dos nuevos títulos.

Tamién te podria gustar