Portada Lliteratura Ámbitu espubliza “Singularidᔠy “La casa gris”, de Pablo Texón ya Ignaciu Llope

Ámbitu espubliza “Singularidᔠy “La casa gris”, de Pablo Texón ya Ignaciu Llope

by asturnet

La editorial Publicaciones Ámbitu pon a la venta dos novedaes lliteraries con motivu del Día de les Lletres. Trátase de los llibros, “Singularidá”, del escritor ayeranu Pablo Texón y “La casa gris”, del pixuetu Ignaciu Llope, y que pueden mercase nes llibreríes y na tienda d’Ámbitu.

En “Singularidᔠaxúntense dellos testos curtios de Pablo Texón, onde’l poeta y narrador encara de manera sincera y con gran xeitu la reflexón sobre dellos esmolecimientos personales y sociales. Texón, fuxendo de l’autocomplacencia, muestra no filosóficu un ciertu pesimismu vitalista. Y no lliterario, vuelve a descubrise como un maestru de la prosa poética, onde l’escritor ye humilde compañeru de camín y non guía.

D’otra banda, Ignaciu Llope percuerre en “La casa gris” asuntos como’l cuadonguismu, la estroza del paisaxe tradicional o la identidá, que trescalen los artículos periodísticos axuntaos nesti volume. La poesía, la precisión y la pasión nel análisis en cada tema que se trata, faen de la llectura de caún de los artículos un exerciciu intensu abiertu al debate y a la reflexón. Y, siempre, cola raíz n’Asturies.

Tamién te podria gustar