Alfredo González va representar a Asturies esti sábadu nel “Eurovisión” de les llingües minorizaes

30 ochobre 09:25 2009 Imprimir

Alfredo González yá ta en Frisia y preparándose pa la so participación, la segunda d’Asturies, nel Liet International, el festival musical de llingües minorizaes europees. El cantautor Alfredo González va ser el primeru en xubir al escenariu del Teatru De Harmoine de Leeuwarden esti sábadu, interpretando “La nada y tu”, col que yá ganó’l Premiu al Meyor Cantar en Llingua Asturiana del añu 2009. Xunto a González, una delegación asturiana va tar nel llugar, encabezada por Consuelo Vega, Directora Xeneral de Política Llingüística.

Once grupos o cantantes finalistes van participar nesti festival, que ñació nel añu 2002 como heriede d’un concursu de canción frisona –llingua falada en zones ente los Países Baxos y Alemaña– bien veteranu que recibía’l nome de Liet (‘cantar’, en frisón).

El representante asturianu nel xuráu del Liet International ye Lisardo Lombardía, especialista musical reconocíu con una trayectoria amplia como periodista, promotor musical, responsable de la discográfica asturiana Fonoastur y director artísticu del Festival Intercélticu de Lorient.

Radio Sele va tar en directu y en vivu nel festival a les 20:00 hores con Dani Vallina, Carlos Pulgar y Felix Lillo. CNN Internacional va emitir amás les imáxenes del Festival dende la so web.

Alfredo González entrevistáu esti sábadu dende Frisia na Cadena SER de Xixón

  Categories:
Loading Facebook Comments ...