Alcuerdu unánime por que’l campus de Xixón ufierte Organización Industrial

Alcuerdu unánime por que’l campus de Xixón ufierte Organización Industrial
18 xineru 10:59 2018 Imprimir

La negociación enllargose hasta l’últimu minutu, pero a la fin el consensu foi posible y la Corporación de Xixón aprobó por unanimidá una declaración institucional de sofitu a la implantación en Xixón de los estudios d’Organización Industrial.

Nesta declaración nun se fai referencia concreta a los niveles de grau o máster, que foi unu de les principales torgues nes conversaciones calteníes ente los grupos políticos mientres tola selmana. Nel testu consensuáu, el Plenu “encamienta a la Conseyería d’Educación y a la Universidá d’Uviéu a algamar un alcuerdu que faiga posible la implantación de los estudios d’Inxeniería d’Organización Industrial na Escuela Politécnica de Xixón, dende’l respetu al ámbitu competencial de cada unu y a l’autonomía universitaria, pero empobináu a avanzar na relación tan necesaria ente la Universidá y l’empresa, ente la especialización y la formación, pa xenerar nueves oportunidaes llaborales a los nuesos mozos”.

La directora xeneral d’Universidaes ya Investigación del Principáu, Cristina Valdés, señaló ayeri demientres un actu nel campus de Mieres nes Xornaes d’innovación Docente qu’el so departamentu “nun niega la importancia que tien la organización industrial, nin les competencies y el perfil profesional del títulu, pero nesti momentu tenemos unos allegamientos que tamos estudiando”. Añedió que “los procesos nunca tán zarraos y nós tenemos siempres tola voluntá pa falar y dialogar, y estudiar esti tipu de cuestiones dientro de les nueses responsabilidaes”.

Y pela so parte’l rector, Santiago García Granda, manifestó’l so enfotu en que “les postures concíliense y tengamos una solución feliz, que nun puede ser otra que la implantación del grau en Xixón”, destacando que se trata d’una titulación demandada pola sociedá y que la Universidá quier, polo que nun hai razón de pesu pa la so paralización.

 

  Categories: