Alcuerdu de collaboración ente les universidaes d’Uviéu y Qilu, en China

Les universidaes d’Uviéu y de Qilu (China), nel Nordés del país asiáticu, suscribieron la selmana pasada un alcuerdu de collaboración pa fomentar l’intercambiu de docentes y alumnos y los proyectos d’investigación conxuntos.

L’alcuerdu de collaboración ente dambos centros inclúi tamién la realización d’estancies sabátiques, el desenvolvimientu conxuntu ya intercambiu de materiales pa la investigación y la docencia y l’organización de conferencies, seminarios y otres actividaes. Los coordinadores d’esti conveniu son, en representación de la Universidá d’Uviéu, María José Álvarez Faedo, directora d’área de Norteamérica y restu del mundu y, pola Tecnolóxica de Qilu, Zheng Zhong, director de la Oficina Internacional.

El director de la Oficina Internacional de la universidá de Qilu –institución especializada n’estudios tecnolóxicos que foi fundada en 1948 y nestos momentos acueye a 30.000 estudiantes, a 1.700 profesores y a cerca de 2.500 investigadores- convidó formalmente a Santiago García Granda a visitar les instalaciones chines, partíes en cuatro campus, y fixo fincapié en que l’oxetivu de la Universidá que dirixe ye igualar el númberu d’estudiantes de grau y el de posgráu. El conveniu foi robláu na Sala de Profesores del Edificiu Históricu polos rectores de dambes instituciones, Santiago García Granda y Chen Jiachuan, respectivamente.