Portada Cine Al Pacino xúnese al filme de Tarantino sobro l’asesinatu de Sharon Tate

Al Pacino xúnese al filme de Tarantino sobro l’asesinatu de Sharon Tate

by redacción asturnews
Al Pacino at Caffe Dante - Foto: Jens Schott Knudsen (https://www.flickr.com/photos/pamhule/)

Al Pacino va ponese por primer vegada na so carrera a les ordes del cineasta Quentin Tarantino na cinta “Once Upon a Time in Hollywood”, sigún el mediu especializáu Variety.

Ganador del Oscar por Esencia de Muyer (1992) y convertíu nuna lleenda del cine pola triloxía de “El Padrín”, Al Pacino va xunise a un elencu estelar nel que figuren Leonardo DiCaprio, Brad Pitt, Margot Robbie, Burt Reynolds, Damian Lewis, Emile Hirsch y Dakota Fanning.

El filme “Once Upon a Time in Hollywood” llega arrodiáu d’una gran espectación non solo por ser el nuevu llargumetraxe d’unu de los directores más populares y carismáticos del cine contemporaneu, sinón tamién porque’l so argumentu tien que ver col asesinatu de Sharon Tate (1969).

”Ye una hestoria que tien llugar en Los Ánxeles en 1969, nel apoxéu del Hollywood hippie. Los dos protagonistes son Rick Dalton (DiCaprio), una antigua estrella de wésterns televisivos, y el so doble d’acción Cliff Booth (Pitt). Los dos tienen problemes pa trunfar nun Hollywood que yá nun reconocen. Pero Rich tien xuna vecina bien famosa… Sharon Tate”, adelantró Tarantino en marzu.

Tate, esposa del director Roman Polanski, foi una de los nueve persones que morrieron a manos de Charres Manson y la secta “La Familia”, que los sos crímenes conmocionaron a la sociedá estadounidense y marcaron simbólicamente un puntu y aparte na contracultura de los años 60.

Manson foi condergáu a cadena perpetua y finó ‘ pasáu 19 de payares a los 83 años.Pitt y DiCaprio yá trabayaron con Tarantino: El primeru participó en “Malditos Bastardos” (2009),  ente que’l segundu intervieno en “Django Desencadenáu” (2012).

L’estrenu d’esta película, la primera de Tarantino tres “Los Odiosos Ocho” (2015), ta previstu pal 9 d’agostu de 2019, fecha na que se van cumplir 50 años de la muerte de Tate. La filmografía de Tarantino inclúi les cintes “Reservoir Dogs” (1992), “Pulp Fiction” (1994) o los dos apurres de “Kill Bill” (2003 y 2004).

Once Upon a Time in Hollywood va ser la primer película del director que nun cunte col respaldu del productor Harvey Weinstein, qu’apostó por él dende “Reservoir Dogs”, pero que la so reputación na industria audiovisual fundióse dempués de que decenes de muyeres acusárenlu de distintos episodios d’agresión sexual.

Tamién te podria gustar