Agostu dexó en Xixón los meyores datos turísiticos de la España Verde

Agostu dexó en Xixón los meyores datos turísiticos de la España Verde
28 setiembre 08:10 2020 Imprimir

Los datos oficiales acabante publicar pol Institutu Nacional d’Estadística revelen que Xixón rexistró n’agostu, magar la situación marcada pola pandemia de la Covid-19, una tasa d’ocupación hotelera del 65,1%. Anque la cifra ye un -24,4% menor que la del añu pasáu, el descensu foi menor en Xixón que nel restu de les ciudaes de la España Verde, onde la tasa d’ocupación media cayó un -32,7%.

Tamién se repara nuna medría nos díes d’estancia media, que s’asitia en 2,6 nueches, un +1,8% más que nel mesmu mes de 2019. El restu de ciudaes de la España Verde atropa resultancies negatives y solo Santiago rexistra una medría (+0,1%), anque menor qu’en Xixón.

Según l’Institutu Nacional d’Estadística, el númberu d’establecimientos hoteleros abiertos al públicu nel mes d’agostu en Xixón foi de 65, seis menos de los que taben abiertos n’agostu del añu pasáu (un 8,6% menos qu’en 2019). Esto oldea cola situación a nivel nacional, onde abrieron el 23,2% menos d’establecimientos al respective de agostu de 2019.

  Categories: