Portada Sociedá Afayada la construcción más grande del imperiu maya

Afayada la construcción más grande del imperiu maya

by redacción asturnews

Nun va ser tan espectacular nin tan vistosa como una pirámide, pero ye la más grande: la revista Nature publica esti miércoles una investigación arqueolóxica, liderada poles universidaes norteamericanes de Arizona y de North Carolina, que desvela la mayor construcción de la cultura maya.

Con casi kilómetru y medio de norte a sur y raspiando los 400 metros d’este a oeste, amás de diverses plataformes y víes converxentes, la construcción conviértese oficialmente nel mayor d’una de les cultures qu’apoderó centroamérica mientres sieglos. Una inmensa escampada llamada Enaguada Fénix na que, precisamente pol so tamañu, naide había reparao hasta agora. Y pa finar, ta arrodiada d’una ventena de complexos menores lo que da una idega de la so importancia.

Calcúlase que foi construyida mientres unos doscientos años, ente’l 1.000 y el 800 aC, “probablemente como un llugar d’usu ritual comunal, de xuru yera un llugar de xunta d’un gran númberu de persones”, esplica nuna entrevista per corréu electrónicu l’antropólogu de la Universidá de Arizona Takeshi Inomata, co-autor del artículu científicu, al pie de Patricia McAnany, de la universidá de North Carolina.

El llugar paecía una gran escampada natural hasta que la tecnoloxía Lidar (Laser Imaging Detection and Ranging) pasó penrrriba d’elli. Tratase d’una especie de güeyu de ferre láser, aplicáu en vuelos n’avioneta a 650 metros d’altor -que se fixeron ente 2017 y 2019- analizando’l terrén con distintos graos d’enclín.

El Lidar dexa detectar densidaes y perfilar mapes en 3D, y foi emplegáu p’afayar restos arqueolóxicos en plena selva; en Guatemala, por casu, detectar en 2018 restos de 60.000 construcciones encloyaes pola maleza. Agora, el Lidar saca a la lluz esti importante centru de xunta xuntu al ríu Usumacinta, na frontera ente México y Guatemala.

Tamién te podria gustar